O‘zbekistonda elektr energiyasi ishlab chiqaradigan yangi stansiyalar qurish, energetika tarmoqlarini rivojlantirish uchun kamida 20 milliard dollar kerak. Bu haqda energetika vaziri o‘rinbosari Sherzod Xo‘jayev 24–26-mart kunlari o‘tkazilgan Toshkent xalqaro investitsiyalar forumida “Daryo” muxbiriga bergan intervyusida ma’lum qildi.
Vazir o‘rinbosarining aytishicha, 20 milliard dollar yirik mablag‘ bo‘lgani uchun davlat uni to‘liq investitsiya qila olmaydi.
“2030-yilgacha moliyaviy resurlarga bo‘lgan ehtiyojimizni hisoblab chiqqanimizda, elektr energiyasini ishlab chiqaradigan yangi stansiyalar qurish va tarmoqlarni rivojlantirish uchun eng kamida 20 milliard dollar pul sarflashimiz kerakligi aniqlandi. Ammo 20 milliard dollar davlat investitsiyasi bo‘la olmaydi. Buning 70-80 foizi xususiy investitsiya bo‘lishi kerak, qolgan 20-30 foizini davlat sarflashi mumkin. Asosiy sarmoyalarni xususiy sektor olib kelishi lozim. Xususiy sektor qachon olib keladi? Qachonki, ishonsa. Ko‘rishingiz mumkin, iqtisodiyotning boshqa sohalaridan farqli o‘laroq, energetikaga tashqi investorlarning ishonchi katta. O‘zbekistondagi eng yirik miqdordagi to‘g‘ridan to‘g‘ri xorijiy investitsiyalar asosida qurilayotgan loyihalar energetika sohasida”, — dedi vazir o‘rinbosari.
Sherzod Xo‘jayev energetikaga nega tashqi qarz va davlat budjetidan yirik miqdordagi mablag‘lar yo‘naltirilishiga ham izoh berdi.
“Unutmaslik lozimki, energetika — butun iqtisodiyotning lokomotivi. Biz tashqi qarz evaziga qurgan stansiyalarimiz yoki tarmoqlarimiz yetkazib bergan energetika butun iqtisodiyotni rivojlantiradi. Lekin shunday bo‘lsa ham, davlat kafolati ostidagi tashqi qarzni jalb qilishdan bosqichma-bosqich voz kechishimiz kerak. Bu borada aniq maqsadimiz bor. Xalqaro kredit reytinglarini olish, kompaniyalarimizni mustaqil, davlat kafolatisiz kredit jalb qilishga imkoniyati bo‘lsin, buning uchun kompaniyalarda boshqaruv tizimimizni, xodimlarning fikrlashini o‘zgartirishimiz kerak” — dedi vazirlik rasmiysi.
Uning qo‘shimcha qilishicha, sohaga yangi texnologiyalarni joriy qilmasdan turib yuqori samaradorlikka erishib bo‘lmaydi.
“Albatta, energetikaga birinchi navbatda yangi, zamonaviy texnologiyalarni joriy qilish kerak. Qolaversa, yosh kadrlarni tayyorlashga juda katta e’tibor qaratishimiz shart. Yosh kadrlarimiz texnologiyalarni amalga tatbiq qilib, kelajakda foydalanadi”, — dedi Sherzod Xo‘jayev.
Avvalroq Surxondaryo viloyati Angor tumanida yangi issiqlik elektr stansiyasi qurilishiga bag‘ishlangan marosim bo‘lib o‘tgani xabar qilingandi. Tadbirda prezident Shavkat Mirziyoyev ushbu loyihaning umumiy qiymati 1 milliard 200 million dollarni tashkil etib, stansiya qurilishi davlat-xususiy sheriklik asosida amalga oshirilishini aytgan.
Shuningdek, prezident qarori bilan O‘zbekistonda Qayta tiklanuvchi energiya manbalari milliy ilmiy-tadqiqot instituti tashkil etilgan.
Energetika vaziri o‘rinbosari Sherzod Xo‘jayev bilan suhbatning to‘liq matni “Daryo”da e’lon qilinadi.
Izoh (0)