Samarqanddagi gaz ta’minoti bo‘limida sodir bo‘lgan baxtsiz hodisa yuzasidan qo‘shimcha ma’lumot berildi

Samarqand viloyati Toyloq tumani “Toyloqtumangaz” gaz ta’minoti bo‘limi binosida sodir bo‘lgan voqea yuzasidan tuman hokimligi axborot xizmati qo‘shimcha ma’lumot berdi.

Qayd etilishicha, 2022-yilning 18-mart kuni soat 15:00 larda “Toyloqtumangaz” gaz ta’minoti bo‘limi elektron gaz hisoblagich muhandisining xizmat xonasida portlash sodir bo‘lgan. Oqibatda “Toyloqtumangaz” gaz ta’minoti bo‘limining 2 nafar xodimi hamda 2 nafar murojaat bilan kelgan fuqaro tan jarohati olgan.

Dastlabki ma’lumotlarga ko‘ra, mazkur xonada o‘rnatilgan va ishlab turgan Artel konditsioneri chaqnashi oqibatida xonada portlash sodir bo‘lgani aniqlangan. Voqea joyidan nosoz holatda kelgan bir dona Artel konditsioneri ashyoviy dalil sifatida olingan.

Baxtsiz hodisa tufayli tan jarohati olgan fuqarolar zudlik bilan shifoxonaga yotqizilib, zaruriy muolajalar qilingan. Ta’kidlanishicha, ayni damda bemorlarning ahvoli yaxshi.

Avvalroq “Daryo” muxbiriga ma’lumot taqdim etgan “Toyloqtumangaz” bo‘limi rahbari Bekzod Sharopov voqea joyida yong‘in va chaqnash holati bo‘lmaganini aytgan edi.

Hozirgi vaqtda ushbu holat bo‘yicha tuman IIB huzuridagi tergov bo‘limi tomonidan tergov-surishtiruv ishlari olib borilmoqda.