Toshkentdagi korxona yotoqxonasida sodir bo‘lgan portlash yuzasidan jinoyat ishi qo‘zg‘atilib, 3 kishi qamoqqa olingan

2021-yilning noyabrida Toshkentdagi korxona yotoqxonasida sodir bo‘lgan portlash oqibatida 18 kishi jarohat olgani to‘g‘risida xabar berilgandi. Bosh prokuratura matbuot kotibining “Daryo”ga ma’lum qilishicha, portlash yuzasidan qo‘zg‘atilgan jinoyat ishi doirasida uch kishi qamoqqa olingan.

29-noyabr kuni soat 05:05 da Sergeli tumani Nilufar 3-tor ko‘chasida joylashgan “Uzmill” MChJ hududida ishchilar uchun joylashgan yotoqxonada yong‘in sodir bo‘lgan va bir necha ishchilar turli jarohatlar bilan shifoxonaga yotqizilgan edi.

Ushbu holat yuzasidan “Sergelitumangaz” ta’minoti bo‘limi mansabdor shaxslariga nisbatan Toshkent shahar prokuraturasi tomonidan Jinoyat kodeksining 205-moddasi (hokimiyat yoki mansab vakolatini suiiste’mol qilish) 2-qismi “a” bandi va boshqa moddalar bilan jinoyat ishi qo‘zg‘atilgan.

Tergov davomida aniqlanishicha, “Uzmill” MChJ rahbari rasmiy xatlar orqali jamiyat hududidagi yerosti quvuridan havoga gaz sizib chiqayotgani to‘g‘risida “Sergelitumangaz” ta’minoti mansabdor shaxslarini xabardor qilgan. Biroq “Sergelitumangaz” ta’minoti bo‘limi mansabdor shaxslari gaz sizib chiqishini bartaraf etish yuzasidan choralarni ko‘rmagan.

Oqibatda yerosti gaz quvuri teshiklaridan havoga gaz uchib chiqib chaqnash sababli portlash sodir bo‘lgan va yong‘in oqibatda 18 nafar ishchilar turli og‘ir tan jarohatlari olib, ko‘rsatilgan tibbiy yordamga qaramasdan, ulardan 2 nafari vafot etgan.

Hozirda jinoyat ishi doirasida 3 nafar shaxs — “Sergelitumangaz” ta’minoti bo‘limi boshlig‘i, bosh muhandis va foydalanish bo‘yicha nazorat xizmati boshlig‘iga nisbatan “qamoqqa olish” tarzidagi ehtiyot choralari qo‘llanilgan. Hozirda tergov harakatlari yakunlash arafasida.

Bundan oldin Andijonda to‘rt nafar fuqaro is gazidan zaharlanib vafot etgani, Qo‘qondagi xonadonda gaz portlashi sodir bo‘lgani, Farg‘onadagi hammomda gaz portlashi oqibatida 3 kishi vafot etgani to‘g‘risida xabar berilgandi.