Qashqadaryo viloyatining Shahrisabz tumani hokimligi hokim Samad Hasanovni saviyasiz va “tupoy” deb atagan Kabul Dusovni prokuraturaga berdi. Bu haqda “Daryo”ga Samad Hasanovning matbuot kotibi Bahodir Halimov xabar berdi.
Hokimlikning ma’lumot berishicha, Kabul Dusov hokim Samad Hasanovga telefon qilib, kelinini ishga tiklashini talab qilgan. Hokim esa bu haqda sud qarori borligini aytib, bu ish uning vakolatiga kirmasligini ma’lum qilgan. Dusov esa hokimning bu javobiga nisbatan uni saviyasiz va “tupoy” deb atagan.
Hokimlik Kabul Dusovni masalaga bir tomonlama yondashishda ayblab, Samad Hasanov nomiga haqoratomuz so‘zlar qo‘llagani uchun uning xatti-harakatini chegaradan chiqish deya baholagan.
“Kabul Dusov 25-mart kuni tuman hokimiga to‘rt marotaba (10:02, 10:25, 11:20, 12:44) qo‘ng‘iroq qilib, Adiba Narzullayeva ismli fuqaro uning kelini, ukasining rafiqasi bo‘lishini, uning mehnat nizosi bilan bog‘liq muammosi yechim topmayotganini, shuning uchun bu ishni ‘bir og‘iz gapi bilan’ hal qilib berishini so‘ragan. Tuman hokimligi ushbu mehnat nizosini hal etish maqsadida ishchi guruh tuzib, vaziyatni to‘liq o‘rganib ko‘rgach, bu masala yuzasidan sud qarori borligini aniqlagan. Shu bois hokim Kabul Dusovga bu ish yuzasidan sud qarori chiqqanini, shu bois mazkur masalaga aralasholmasligini, vakolatiga kirmasligini aytgan”, — deydi Bahodir Halimov.
Ma’lumot berilishicha, Shahrisabz tumanining “Shakarteri” MFY, Shovkan qishlog‘ida yashovchi fuqaro Madina Rasulova 2016-yil 3-yanvar kuni tuman tibbiyot birlashmasiga qarashli Shovkan qishloq vrachlik punktida ishlovchi Adiba Narzullayevaning tug‘uruq ta’tiliga chiqishi munosabati bilan uning o‘rniga 0,5 stavka doya hamshirasi sifatida ishga qabul qilingan. Tibbiyot birlashma boshlig‘ining 2017-yil 18-apreldagi buyrug‘iga ko‘ra Shovkan QVPning yuridik maqomi tugatilib, yangi tashkil etilgan 39-qishloq oilaviy poliklinikasiga qo‘shib yuborilgan. Shu sabab 0,5 stavka doya hamshiralik shtati tugatilgan va barcha ishchi xodimlar, shu jumladan, Madina Rasulova bilan ham 39-QOP rahbariyati o‘rtasida yangi mehnat shartnomasi tuzilib, ishini davom ettirgan.
Madina Rasulova keyinchalik yangi tashkil etilgan Ko‘p tarmoqli markaziy poliklinikada 0,5 stavkada registratura hamshirasi va 0,25 stavkada AKG hamshirasi sifatida ish faoliyatini davom ettirgan. Tuman tibbiyot birlashmasi boshlig‘ining 2020-yil 1-maydagi buyrug‘i bilan tug‘uruq ta’tilidan qaytgan Adiba Narzullayevaga Madina Rasulovaning ish o‘rni olib berilgan.
“Aslida Adiba Narzullayevaning QVPdagi doya shtati tugatilgani uchun unga mavjud vakant o‘rinlari taklif etilishi kerak edi. Biroq ish beruvchi Adiba Narzullayevaga o‘zining doimiy ish o‘rniga ega bo‘lgan Madina Rasulovaning 0,25 AKG va 0,5 registratura hamshirasi ish o‘rnini olib bergan. Madina Rasulova esa Fuqarolik ishlari bo‘yicha Shahrisabz tumanlararo sudiga ariza bilan murojaat qilib, haq-huquqini talab qilgan. Sudning 2021-yil 19-noyabrdagi qaroriga ko‘ra Shahrisabz tuman tibbiyot birlashmasi boshlig‘ining 2020-yil 1-maydagi buyrug‘i g‘ayriqonuniy deb topilgan va Madina Rasulova o‘z ishiga tiklangan. Shundan so‘ng, Adiba Narzullayevaga yashash hududiga yaqin bo‘lgan 39-oilaviy poliklinikada faoliyatini davom ettirishi uchun ish taklif etilgan, ammo u bu taklifni rad etgan. Keyinchalik Adiba Narzullayeva prezidentning Shahrisabz tumanidagi Xalq qabulxonasi bilan birgalikda sektorlar rahbarlari tomonidan o‘tkaziladigan fuqarolar qabulida bo‘lib, ushbu masalani o‘z manfaati yo‘lida ijobiy hal etib berishlarini so‘ragan. Tuman hokimi esa unga sud qaroridan norozi bo‘lsa, faqat manfaatdor tomonlarning o‘zi yuqori turuvchi sudga murojaat qilishi mumkinligini tushuntirgan. Tuman Adliya bo‘limiga murojaatni qonun doirasida o‘rganib chiqishi va amaliy yordam berishi bo‘yicha og‘zaki ko‘rsatma berilgan. Adliya bo‘limi Adiba Narzullayeva murojaatini o‘rganib chiqib, fuqaroning manfaatini ko‘zlagan holda Shahrisabz tuman tibbiyot birlashmasiga tug‘uruq ta’tilidan qaytgan Adiba Narzullayevani 0,5 stavka ish bilan ta’minlash chorasini ko‘rishi haqida ogohlantirib, taqdimnoma kiritgan”, — deyiladi hokimlikning bu haqdagi rasmiy munosabatida.
Shahrisabz tumani hokimi Samad Hasanov bilan telefon orqali muloqot qilgan Kabul Dusov hokimga “sudni siz nazorat qilasiz, aka”, deb aytib, ishini hal qilib berishini so‘ragan.
“O‘rganishlar natijasida bloger sifatida tanilgan Kabul Dusovning Adiba Narzullayeva bilan qarindosh emasligi ma’lum bo‘ldi. Adiba Narzullayevaning mehnat nizosi esa tuman prokuraturasi va tuman aholi bandligiga ko‘maklashish markazi tomonidan qayta o‘rganilishi belgilandi”, — deydi hokimlik axborot xizmati rahbari.
Hokimlik Kabul Dusovning shaxsiy Telegram-kanali orqali tarqatilgan xabarda tuman hokimi sha’niga nisbatan haqoratomuz so‘zlar qo‘llangani uchun bloger ustidan qonuniy to‘xtamga kelish uchun to‘plangan hujjatlar va suhbatdoshlar o‘rtasidagi audioyozuvni viloyat prokuraturasiga yuborgan.
Izoh (0)