Video: Bir oydan buyon urush ketayotgan Ukrainadagi hayot

24-mart kuni Ukrainada Rossiya bosqini boshlanganiga bir oy to‘ldi. Bu vaqt davomida Ukraina shaharlari aviazarbalardan katta talafot ko‘rdi, binolar vayron bo‘ldi. Qamalda qolgan hududlarda mahalliy aholi gumanitar yordam bilan kun kechirmoqda. Xarkov metrosi va shu kabi yuzlab yerosti boshpanalarida odamlar o‘qlardan yashirinmoqda.

Rossiya bosqini boshlanganidan beri qizi bilan Xarkov metrosida yashayotgan Natalya Shaposhnik u yerdagi sharoit haqida shunday dedi:

“Albatta, bu yer uyimizdek emas, lekin yashashga yaroqli. Yashash sharoitimiz boshqalarga qaraganda yaxshiroq deyish mumkin, ya’ni platformada yotmayapmiz. Farzandim bilan vagonga joylashganmiz, ovqat berishadi, hojatxona bor, hammasi yaxshi”.

Ukrainaning Donetsk viloyatida joylashgan Mariupol shahri ham vayronagarchilikka uchragan. Shahardagi sobiq savdo markazi gumanitar yordam uchun tizilgan odamlarning uzun navbatlari bilan to‘la.

“Turmush o‘rtog‘im gumanitar yordamga yeta olmadi, qandli diabet bilan kasallangandi. Oxirgi kunlarda kam ovqatlanish sabab komaga tushdi va vafot etdi. Yordamga yetolganda, balki hozir tirik bo‘lardi. Uning o‘lgani haqida rossiyalik qarindoshlariga haligacha xabar qilolmadim”, —  deydi mahalliy aholidan biri Aleksandra.

Mariupolda ko‘pchilik vaqtincha boshpana olish uchun Rossiyaning janubidagi Taganrog shahriga evakuatsiya qilingan. Ulardan biri — pediatr Galina Ovchinnikova jangovar harakatlar paytida Mariupoldagi hayotni shunday eslaydi:

“Biz bir kunda bir marta ovqatlanardik. Ovqatlarni ertalab pishirib qo‘yib, kun davomida shularni yerdik. Qolgan vaqtda yerto‘lada o‘tirardik. U yer iflos va qorong‘i edi. Sham yoqardik, moy lampalar yasardik. Yerto‘la sovuq edi”.

Sakson uch yoshli Raisa Qayratning aytishicha, qamal boshlangandan beri qizi va nabirasi bilan aloqa uzilgan.

“Mariupol g‘oyat go‘zal edi, ammo birdan chang-to‘zonda qoldi. Odamlarga qarata o‘t ochishga qanday jur’at etishyapti? Ular hayvon, odam emas. Bolalar bog‘chalari, do‘konlar, maktablar vayron bo‘lgan. Nega odamlar yashaydigan uylarga o‘q uzishyapti? Nima uchun?”, — deydi u.

Ammo Rossiya tinch aholi nishonga olinayotganini rad etmoqda, bosqinni esa “maxsus harbiy operatsiya” deb atamoqda.