AQSH Ukrainadagi mojarolarning avj olishi sabab mamlakatni tark etgan 100 ming nafargacha ukrainalikni qabul qilishni rejalashtirmoqda, deb yozadi Reuters.
Xabar qilinishicha, ukrainaliklarning bir qismi qochqinlar dasturi orqali qabul qilinadi, boshqalari esa oilaviy vizalar yoki “gumanitar parol” deb ataladigan jarayon orqali AQSH chegarasini kesib o‘tishi mumkin bo‘ladi. Bunday parol shoshilinch tibbiy yoki gumanitar sabablarga ko‘ra, shuningdek, boshqa favqulodda vaziyatlarda har qanday chet el fuqarosiga AQSHga kirish uchun berilishi mumkin.
Reuters ma’lumotlariga ko‘ra, Amerika tomoni o‘z hududiga 100 ming nafargacha muhojirni kiritishga tayyor. Shu bilan birga, AQSHda ukrainalik qochqinlar uchun immigratsiya va transport logistikasi qanday yo‘lga qo‘yilishi hozircha ma’lum emas.
Birlashgan Millatlar Tashkilotining qochqinlar ishlari bo‘yicha agentligiga ko‘ra, harbiy harakatlar boshlangan 24- fevraldan beri 3,5 milliondan ortiq odam Ukrainani tark etgan.
Avvalroq BMT jarayon ko‘lami va tezligidan kelib chiqib, sodir bo‘layotgan voqealarni Ikkinchi jahon urushidan keyingi eng yirik migratsiya inqirozi deb atagandi. Shu bilan birga, xorijga chiqib ketgan ukrainalik qochqinlarning deyarli yarmi bolalar.
Izoh (0)