Rossiya Yevropa kengashidan chiqarib yuborilganidan so‘ng, mamlakatda o‘lim jazosini qayta tiklash uchun hech qanday cheklov qolmadi — “jamiyat hayotida nimadir o‘zgarsa” moratoriy qayta ko‘rib chiqilishi mumkin. Bu haqda Rossiya Xavfsizlik kengashi raisi o‘rinbosari Dmitriy Medvedev “RIA Novosti”ga bergan intervyusida ma’lum qildi.
“Hozirgi vaziyatga qaytadigan bo‘lsa, u qanday bo‘lsa, shunday: xalqaro asoslar yo‘qoldi, Konstitutsiyaviy sudning ichki huquqiy pozitsiyasi bor. Ushbu huquqiy pozitsiyalar amaldagi huquqiy tartibga, hozirgi jinoyat holatiga asoslanadi. Men barchasi tinch bo‘lsa, ushbu huquqiy pozitsiyalar shundayligicha qolishidan kelib chiqyapman. Ammo huquqiy pozitsiyalar abadiy emas, jamiyat hayotida nimadir o‘zgarsa, mazkur huquqiy pozitsiyalar ham qayta ko‘rib chiqilishi mumkin”, — deydi Medvedev.
Uning so‘zlariga ko‘ra, Rossiya Konstitutsiyaviy sudining o‘lim jazosiga moratoriysi — bu “muqaddas bitiklar emas”, sud qarori o‘zgarishi mumkin.
“Davlatimiz tarixida bu kabi davrlar bo‘lgan. Eslatib o‘tamiz, urushdan keyin Sovet ittifoqi o‘lim jazosini qo‘llashni bekor qildi. Bu uzoq davom etmadi. Ko‘p o‘tmay o‘lim jazosi qayta tiklandi. Bunga zo‘ravonlikka bog‘liq jinoyatlarning, jumladan, qotilliklarning ortib ketishi sabab bo‘lgan. Kelajakda nima bo‘lishini men bilmayman”, — deydi u.
Ma’lumot uchun, hozirgi vaqtda Rossiyada o‘lim jazosiga nisbatan moratoriy joriy etilgan. Moratoriy 2009-yili Konstitutsiyaviy sud qarori bilan mustahkamlab qo‘yilgan. Rossiyada o‘lim jazosi bo‘yicha so‘nggi qatl 1996-yil 2-sentabr kuni amalga oshirilgan. 2015-yilda Rossiya Davlat dumasi deputati Vadim Solovev terrorchilik harakatini sodir etgan shaxslar uchun eng oliy jazo sifatida o‘lim jazosini joriy etishni taklif qilgandi.
Izoh (0)