Видео: Бир ойдан буён уруш кетаётган Украинадаги ҳаёт

24 март куни Украинада Россия босқини бошланганига бир ой тўлди. Бу вақт давомида Украина шаҳарлари авиазарбалардан катта талафот кўрди, бинолар вайрон бўлди. Қамалда қолган ҳудудларда маҳаллий аҳоли гуманитар ёрдам билан кун кечирмоқда. Харьков метроси ва шу каби юзлаб ерости бошпаналарида одамлар ўқлардан яширинмоқда.

Россия босқини бошланганидан бери қизи билан Харьков метросида яшаётган Наталя Шапошник у ердаги шароит ҳақида шундай деди:

«Албатта, бу ер уйимиздек эмас, лекин яшашга яроқли. Яшаш шароитимиз бошқаларга қараганда яхшироқ дейиш мумкин, яъни платформада ётмаяпмиз. Фарзандим билан вагонга жойлашганмиз, овқат беришади, ҳожатхона бор, ҳаммаси яхши».

Украинанинг Донецк вилоятида жойлашган Мариупол шаҳри ҳам вайронагарчиликка учраган. Шаҳардаги собиқ савдо маркази гуманитар ёрдам учун тизилган одамларнинг узун навбатлари билан тўла.

«Турмуш ўртоғим гуманитар ёрдамга ета олмади, қандли диабет билан касалланганди. Охирги кунларда кам овқатланиш сабаб комага тушди ва вафот этди. Ёрдамга етолганда, балки ҳозир тирик бўларди. Унинг ўлгани ҳақида россиялик қариндошларига ҳалигача хабар қилолмадим», —  дейди маҳаллий аҳолидан бири Александра.

Мариуполда кўпчилик вақтинча бошпана олиш учун Россиянинг жанубидаги Таганрог шаҳрига эвакуация қилинган. Улардан бири — педиатр Галина Овчинникова жанговар ҳаракатлар пайтида Мариуполдаги ҳаётни шундай эслайди:

«Биз бир кунда бир марта овқатланардик. Овқатларни эрталаб пишириб қўйиб, кун давомида шуларни ердик. Қолган вақтда ертўлада ўтирардик. У ер ифлос ва қоронғи эди. Шам ёқардик, мой лампалар ясардик. Ертўла совуқ эди».

Саксон уч ёшли Раиса Қайратнинг айтишича, қамал бошлангандан бери қизи ва набираси билан алоқа узилган.

«Мариупол ғоят гўзал эди, аммо бирдан чанг-тўзонда қолди. Одамларга қарата ўт очишга қандай журъат этишяпти? Улар ҳайвон, одам эмас. Болалар боғчалари, дўконлар, мактаблар вайрон бўлган. Нега одамлар яшайдиган уйларга ўқ узишяпти? Нима учун?», — дейди у.

Аммо Россия тинч аҳоли нишонга олинаётганини рад этмоқда, босқинни эса «махсус ҳарбий операция» деб атамоқда.