Toshkentda 5 ta avtomobil ishtirokida YTH sodir bo‘ldi, Samarqandda Nexia-3 bilan to‘qnashgan Nexia yonib ketdi

O‘zbekiston yo‘llarida sodir bo‘lgan yo‘l-transport hodisalari tafsilotlarini taqdim etamiz.

Jizzaxda Lacetti piyodani urib ketdi

Jizzax shahrining “Xalqobod” mahallasida istiqomat qiluvchi shaxs boshqaruvidagi Lacetti mahalla hududidagi piyodalar o‘tish joyidan o‘tayotgan fuqaroni urib yubordi.

Oqibatda “Jizzaxlik” mahallasida yashaydigan jabrlanuvchi chap oyoq boldir suyagining yopiq sinishi tashxisi bilan shifoxonaga yotqizildi. Holat yuzasidan tergovga qadar tekshiruv o‘tkazilmoqda.

Toshkentda 5 ta avtomobil to‘qnashdi

Dastlabki ma’lumotlarga ko‘ra, 2022-yil 25-mart kuni soat 16:15 larda Toshkent shahar Yunusobod tumani Ahmad Donish ko‘chasida, avtomobil ko‘prigi ustida oraliq masofani saqlamaslik oqibatida haydovchilar A.E. (1995-yilda tug‘ilgan) boshqaruvidagi Nexia-2, A.I. (1970-yilda tug‘ilgan) boshqaruvidagi Captiva, I.R. (1998-yilda tug‘ilgan) boshqaruvidagi “VAZ-11184”, O.I. (1958-yilda tug‘ilgan) boshqaruvidagi Nexia-3, A.K. (1990-yilda tug‘ilgan) boshqaruvidagi Spark avtomobillar oldinma-ketin to‘qnashgan.

YTH oqibatida tan jarohati olgan fuqarolar yo‘q.

Ushbu YTH yuzasidan Toshkent shahar IIBB JXX YHXB xodimlari tomonidan surishtiruv olib borilmoqda.

Samarqandda ikki Nexia to‘qnashishi oqibatida ularning birida yong‘in chiqdi

Ma’lumotlarga ko‘ra, 2022-yil 25-mart kuni soat 14:30 larda Past Darg‘om tumani “Paxtakor” MFY hududidan o‘tgan Samarqand–Kattaqo‘rg‘on avtomobil yo‘lida haydovchi F.Y. boshqaruvida bo‘lgan Nexia-3 hamda haydovchi A.X. boshqaruvida bo‘lgan Nexia-2 avtomobillari ishtirokida to‘qnashuv sodir bo‘lgan.

To‘qnashuv oqibatida Nexia-2 rusumli avtomobilda yong‘in yuzaga kelgan. Yong‘in o‘t o‘chiruvchilar tomonidan bartaraf etilgan.

Haydovchilarga birinchi tez tibbiy yordam ko‘rsatilgan.

Hozirda ushbu YTH yuzasidan tuman IIB YHXB xodimlari tomonidan surishtiruv olib borilmoqda.