Ўзбекистон йўлларида содир бўлган йўл-транспорт ҳодисалари тафсилотларини тақдим этамиз.
Жиззахда Lacetti пиёдани уриб кетди
Жиззах шаҳрининг «Халқобод» маҳалласида истиқомат қилувчи шахс бошқарувидаги Lacetti маҳалла ҳудудидаги пиёдалар ўтиш жойидан ўтаётган фуқарони уриб юборди.
Оқибатда «Жиззахлик» маҳалласида яшайдиган жабрланувчи чап оёқ болдир суягининг ёпиқ синиши ташхиси билан шифохонага ётқизилди. Ҳолат юзасидан терговга қадар текширув ўтказилмоқда.
Тошкентда 5 та автомобиль тўқнашди
Дастлабки маълумотларга кўра, 2022 йил 25 март куни соат 16:15 ларда Тошкент шаҳар Юнусобод тумани Аҳмад Дониш кўчасида, автомобиль кўприги устида оралиқ масофани сақламаслик оқибатида ҳайдовчилар А.Э. (1995 йилда туғилган) бошқарувидаги Nexia-2, А.И. (1970 йилда туғилган) бошқарувидаги Captiva, И.Р. (1998 йилда туғилган) бошқарувидаги «ВАЗ-11184», О.И. (1958 йилда туғилган) бошқарувидаги Nexia-3, А.К. (1990 йилда туғилган) бошқарувидаги Spark автомобиллар олдинма-кетин тўқнашган.
ЙТҲ оқибатида тан жароҳати олган фуқаролар йўқ.
Ушбу ЙТҲ юзасидан Тошкент шаҳар ИИББ ЖХХ ЙҲХБ ходимлари томонидан суриштирув олиб борилмоқда.
Самарқандда икки Nexia тўқнашиши оқибатида уларнинг бирида ёнғин чиқди
Маълумотларга кўра, 2022 йил 25 март куни соат 14:30 ларда Паст Дарғом тумани «Пахтакор» МФЙ ҳудудидан ўтган Самарқанд–Каттақўрғон автомобиль йўлида ҳайдовчи Ф.Й. бошқарувида бўлган Nexia-3 ҳамда ҳайдовчи А.Х. бошқарувида бўлган Nexia-2 автомобиллари иштирокида тўқнашув содир бўлган.
Тўқнашув оқибатида Nexia-2 русумли автомобилда ёнғин юзага келган. Ёнғин ўт ўчирувчилар томонидан бартараф этилган.
Ҳайдовчиларга биринчи тез тиббий ёрдам кўрсатилган.
Ҳозирда ушбу ЙТҲ юзасидан туман ИИБ ЙҲХБ ходимлари томонидан суриштирув олиб борилмоқда.
Мавзуга доир:
Изоҳ (0)