Namangan shahrida 18-mart kuni otasining mashinasini hech qanday hujjatlarsiz olib chiqqan 18 yoshli yigit yo‘l-patrul xizmati xodimini urib yubordi. Bu haqda viloyat Ichki ishlar boshqarmasi xabar qildi.
Qayd etilishicha, shu kuni B.S. ismli yigit (2003-yilda tug‘ilgan) haydovchilik guvohnomasiga ega bo‘lmay turib, otasiga tegishli Matizni ruxsatsiz olib qochgan. Shaharning Amir Temur ko‘chasida svetoforning qizil chirog‘iga to‘xtamay harakatlangan. Shu hududda xizmat olib borayotgan YPX xodiming to‘xtash ishorasiga bo‘ysunmay, uni mashinaning old qismi bilan urib yuborib, voqea joyidan qochib ketgan.
YTHda jarohat olgan inspektorga tibbiy yordam ko‘rsatilib, shifoxonaga yotqizilgan.
Tekshiruv harakatlari natijasida ushbu shaxs mashinani ustaxonaga olib kelgan vaqtida qo‘lga olingan.
Unga nisbatan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismi tartibida jinoyat ishi qo‘zg‘atilgan. Hozirda tergovga qadar tekshiruv olib borilmoqda.
Izoh (0)