AQShning O‘zbekistondagi elchisi Deniel Rozenblyum mamlakat aholisini Navro‘z munosabati bilan tabrikladi. Uning o‘zbek tilida bildirgan tabrigi elchixonaning ijtimoiy tarmoqlardagi sahifalarida e’lon qilindi.
“Assalomu alaykum, aziz do‘stlar! AQSH xalqi nomidan barhangizni bahor bayrami Navro‘z bilan tabriklayman. O‘zbekistonga bahor kelar ekan, ob-havo va tabiat yanda go‘zallashib ketadi. Bu esa bahor kelganini bayram qilish uchun juda qulay fursatdir”, — deydi u o‘z tabrigida.
Elchi o‘tgan yili Navro‘zdan keyingi davr murakkab kechganini, ammo farzandlarga farovon kelajak barpo etish uchun ishlashda davom etish shartligini, u mustahkam sog‘liq va tinch hayot kechiriladigan kelajak bo‘lishi kerakligini ta’kidlab o‘tgan.
“Barchangizga sog‘liq, davomli tinchlik va mo‘jizalarga boy bahor tilayman. Navro‘z ayyomingiz muborak bo‘lsin”, — deya o‘z tabrigini yakunlagan Deniel Rozenblyum.
Eslatib o‘tamiz, AQSH elchisi 2022-yilning fevralida Alisher Navoiy tavalludining 581 yilligi bilan o‘zbek tilida tabriklagandi. 2021-yilning 21-oktabri — O‘zbek tili bayrami bilan shu tilda tabriklab, tabrik oxirida Hamid Olimjonning “O‘zbekiston” she’ridan to‘rt qator o‘qib bergandi. 2020-yilda esa O‘zbekiston mustaqilligining 29 yilligi munosabati bilan o‘zbek tilida tabrik yo‘llagan edi.
Izoh (0)