АҚШнинг Ўзбекистондаги элчиси Дэниэл Розенблюм мамлакат аҳолисини Наврўз муносабати билан табриклади. Унинг ўзбек тилида билдирган табриги элчихонанинг ижтимоий тармоқлардаги саҳифаларида эълон қилинди.
«Ассалому алайкум, азиз дўстлар! АҚШ халқи номидан барҳангизни баҳор байрами Наврўз билан табриклайман. Ўзбекистонга баҳор келар экан, об-ҳаво ва табиат янда гўзаллашиб кетади. Бу эса баҳор келганини байрам қилиш учун жуда қулай фурсатдир», — дейди у ўз табригида.
Элчи ўтган йили Наврўздан кейинги давр мураккаб кечганини, аммо фарзандларга фаровон келажак барпо этиш учун ишлашда давом этиш шартлигини, у мустаҳкам соғлиқ ва тинч ҳаёт кечириладиган келажак бўлиши кераклигини таъкидлаб ўтган.
«Барчангизга соғлиқ, давомли тинчлик ва мўъжизаларга бой баҳор тилайман. Наврўз айёмингиз муборак бўлсин», — дея ўз табригини якунлаган Дэниэл Розенблюм.
Эслатиб ўтамиз, АҚШ элчиси 2022 йилнинг февралида Алишер Навоий таваллудининг 581 йиллиги билан ўзбек тилида табриклаганди. 2021 йилнинг 21 октябри — Ўзбек тили байрами билан шу тилда табриклаб, табрик охирида Ҳамид Олимжоннинг «Ўзбекистон» шеъридан тўрт қатор ўқиб берганди. 2020 йилда эса Ўзбекистон мустақиллигининг 29 йиллиги муносабати билан ўзбек тилида табрик йўллаган эди.
Изоҳ (0)