Toshkent shahrida javobgarlikdan qochish uchun o‘zini yolg‘ondan davlat xizmatchisi, prokuror, adliya maslahatchisi kabi lavozimlarda tanishtirgan shaxs ushlandi. Bu haqda “Markaziy studiya” informatsion dasturida ma’lum qilindi.
Qayd etilishicha, Bektemir tumanida qora rangli Malibu-2 avtomashinasi svetoforga to‘xtamay harakatlangan. Qoida buzgani uchun yo‘l-patrul xizmati xodimlari tomonidan to‘xtatilgan. Fuqaro ularga yuqori tashkilotda ishlashini aytib, o‘dag‘aylay boshlagan. Xodimlarning tekshiruvi natijasida mashinaning old yon oynalari tegishli ruxsatsiz qoraytirilgani, haydovchi mashinani ishonchnomasiz boshqarayotgani aniqlangan. Fuqaro YPX xodimlariga polkovnik ekanini aytib, xizmat guvohnomasini ko‘rsatgan va xizmatga shoshayotganini aytgan. Yakunda mashina hech qanday hujjatsiz haydalgani uchun jarima maydoniga qo‘yilgan.
Surishtiruv ishlari davomida u o‘zini Bosh prokuraturaning Ichki ishlar organlarida qonunchilik ijrosi ustidan nazorat bo‘limi boshlig‘i, adliya katta maslahatchisi deb tanishtirgan kelgani aniqlangan. Unga 2021-yilda iyun oyida Rossiyadagi U. ismli tanishi O‘zbekiston bosh prokurori imzosi va muhrini soxtalashtirib, qalbaki guvohnoma yasab bergan.
Holat yuzasidan unga nisbatan Jinoyat kodeksining 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 2-qismi “b” va 3-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)