Andijon viloyati Xo‘jaobod tumanida o‘zini huquqni muhofaza qilish organi xodimining yaqin odami deb tanishtirgan shaxslar farzandi javobgarlikka tortilgan onadan pul undirmoqchi bo‘ldi, deb xabar bermoqda Andijon viloyati Ichki ishlar boshqarmasi.
Qayd etilishicha, Xo‘jaobod tumanida yashovchi fuqaro o‘zining qurilishi tugallanmagan hovlisida noqonuniy xo‘roz urushtirish o‘yingohi tashkil qilgan. Kelgan odamlardan 10 mingdan so‘m yig‘ib yurgan. Fuqaro Andijon viloyati IIB xodimlari tomonidan ushlangan. Unga nisbatan Jinoyat kodeksining 278-moddasi (qimor va tavakkalchilikka asoslangan boshqa o‘yinlarni tashkil etish hamda o‘tkazish) bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Shu orada noma’lum shaxs ayblanuvchining onasiga telefon qilib, o‘g‘lining tanishi ekanini, tergov organlarida ishlovchi tanishlari orqali bolasini ozodlikka chiqarib berishini aytgan. Evaziga 6 ming dollar so‘ragan. Ona bundan shubhalanib, shaxsiy xavfsizlik bo‘yicha Andijon viloyati boshqarmasiga murojaat qilgan.
Arizaga asosan xodimlar tezkor tadbir o‘tkazgan. Unda telefon orqali suhbatlashgan shaxs ayolning xonadoniga kelib, 3 ming dollar olayotganda ushlangan.
Holat yuzasidan Jinoyat kodeksining 168-moddasi 2-qismi “a” bandi, 28,211-moddasi 1-qismi (pora berishga dalolat qilish) bilan jinoyat ishi qo‘zg‘atilgan. Ayblanuvchiga nisbatan qamoqqa olish tarzidagi ehtiyot chorasi qo‘llanilgan. Hozirda dastlabki tergov harakatlari olib borilmoqda.
Mavzuga doir:
- Sirdaryoda ikki mahkumni 136 mln so‘m evaziga ozodlikka chiqarib berishni va’da qilgan shaxs aniqlandi
- Qoraqalpog‘istonda mahkumni ozodlikka chiqarib berish uchun 10 ming dollar so‘ragan hamshira ushlandi
- Surxondaryoda 19 yilga qamalgan mahbusni 70 ming dollar evaziga qamoqdan chiqarib bermoqchi bo‘lgan shaxs ushlandi
Izoh (0)