Toshkentda 1 hafta muddatda “prava” olib berishini aytib, fuqarolardan pul olgan erkak ushlandi

Toshkent shahri Yangihayot tumanida fuqarolarni aldab, haydovchilik guvohnomasi olib berish uchun ulardan pul olgan shaxs qo‘lga olindi. Bu haqda Jamoat xavfsizligi departamenti xabar qildi.

Qayd etilishicha, 16-mart kuni I. ismli fuqaro Yangihayot tumani IIBga ariza bilan murojaat qilgan. Unda 25-fevral kuni D. (1977-yilda tug‘ilgan) ismli shaxs bilan tanishib qolganini, u o‘zini tumanning “Fayzli” mahallasida joylashgan Avtodriver Study MChJda ishlashini aytib, haydovchilik guvohnomasi olishda qiyinchilik yuzaga kelsa, ishni hal qilib berishini ma’lum qilgan. Ushbu shaxs fuqaroga amaliy imtihondan o‘tkazib, 1 haftada haydovchilik guvohnomasi olib berishni va’da qilgan. Evaziga 200 ming so‘m so‘rab, pul va imtihonga kirish huquqini beruvchi hujjatlarini olgan. Fuqaro D. ismli shaxs va’dasini bajarmay, aldab yurganini bildirib, unga nisbatan qonuniy chora ko‘rishni so‘ragan.

Shuningdek, shu kuni A. ismli shaxs ham Yangihayot tuman IIBga ariza bilan murojaat qilgan. Unda 25-fevral kuni D. ismli shaxs bilan tanishgani, u o‘zini avtomaktab xodimi deb tanishtirganini va “prava” olib berishni aytganini ma’lum qilgan. U fuqarodan 400 ming so‘m va imtihon hujjatlarini olgan. Bir haftada guvohnoma olib berishini aytib, aldab yurgan. Fuqaro ushbu shaxsga nisbatan qonuniy chora ko‘rishni so‘ragan.

Yuqoridagi holatlar yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atildi. Hozirda tergovga qadar tekshiruv ishlari olib borilmoqda.

Eslatib o‘tamiz, 16-mart kuni Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov Yagona imtihon markazi imtihonlarida korrupsiyaviy holatlar yo‘qligini aytib, fuqarolarni firibgarlardan ogoh bo‘lishga chaqirgandi. “Shiorimiz shuki, bilimingiz bo‘lsagina, haydovchilik guvohnomasini olasiz va rulga o‘tirasiz. Hozirda faqat bilim, bilim, bilim! Boshqachasiga iloji yo‘q”, — degan u.