Prezidentning “Fuqarolarning huquq va erkinliklarini ta’minlash hamda huquqiy xizmat ko‘rsatishda adliya organlari va muassasalari faoliyati samaradorligini yanada oshirish chora-tadbirlari to‘g‘risida”gi farmoni qabul qilindi. Bu haqda Adliya vazirligi “Daryo”ga ma’lum qildi.
Qayd etilishicha, farmon bilan quyidagi asosiy o‘zgartirishlar amalga oshirilmoqda. Birinchidan, adliya tizimida yagona boshqaruvni joriy qilish uchun Davlat xizmatlari agentligi va Intellektual mulk agentligi bevosita Adliya vazirligiga, ularning hududiy tuzilmalari esa hududiy adliya organlariga qo‘shildi. Natijada boshqaruv xodimlari soni 110 taga ya’ni 2,2 foizga (birgina markaziy apparat 10 foizga, ya’ni 356 tadan 320 taga) qisqartirildi. Qisqartirilayotgan shtatlarning asosiy qismini rahbar lavozimlar tashkil qiladi.
Hududlardagi Davlat xizmatlari boshqarmalari hamda Intellektual mulk markazlari hududiy adliya boshqarmalari tarkibiga o‘tkazildi. Tumandagi davlat xizmatlari markazlari, FHDYo organlari va yuridik xizmat ko‘rsatish markazlari tuman adliya bo‘limlari bilan birlashtirilib bitta binoda faoliyat yurituvchi yagona Adliya bo‘limlariga aylantirildi, uning tarkibida intellektual mulk obyektlarini muhofaza qilish bo‘yicha alohida mas’ullar faoliyat yuritadi. Bu orqali intellektual mulk obyektlarini tuman darajasida tezkor himoya qilish, aholining turli huquqiy muammolarini bitta idoraga tashrif buyurib hal qilib ketishiga erishiladi.
Ikkinchidan, vazirlik tizimidagi bir-birini takrorlovchi vazifa va funksiyalar qayta ko‘rib chiqilib, qisqartirildi. Vazirlik tizimidagi boshqaruv tuzilmalari 666 tadan 222 taga (67 foizga), bir-birini takrorlovchi vazifalar 35 tadan 23 taga (34 foizga) va funksiyalar 388 tadan 215 taga (46 foizga) qisqarmoqda. Takrorlovchi vazifa va funksiyalarning qisqartirilishi bevosita xodimlar ish unumdorligi oshishiga, fuqarolarning murojaatlari tez va samarali hal etilishiga yordam beradi.
Uchinchidan, Adliya vazirligi faoliyati samaradorligini yanada oshirish hamda raqamlashtirish bo‘yicha chora-tadbirlar dasturi tasdiqlandi. Dastur doirasida bir-biriga bog‘liq bo‘lgan davlat xizmatlarini, jumladan, ko‘chmas mulk hamda manzilga ro‘yxatga qo‘yish, nogironlik va turli kasalliklarga oid nafaqalar tayinlashni kompozit tarzda, ya’ni bir vaqtda ko‘rsatish tizimini joriy etish orqali aholining sarsongarchiligi oldi olinadi. 1990—2016-yillar oralig‘ida qabul qilingan hukumat qarorlari xatlovdan o‘tkaziladi va ularning bugungi kundagi ahamiyati tahlil qilinib, fuqarolarga va tadbirkorlarga yengillik yaratish nuqtai-nazaridan qayta ko‘rib chiqiladi.
Shuningdek, “e-shartnoma” tizimi yagona elektron portali yaratiladi, bu tizim orqali tadbirkorlar onlayn ravishda turli shartnoma namunalarini bepul olishi mumkin bo‘ladi hamda shartnomaviy-huquqiy munosabatlarda yagona huquqni qo‘llash amaliyoti vujudga keladi. Xalq deputatlari kengashlarining hududlardagi islohotlar ustidan nazoratini kuchaytirish maqsadida deputatlik nazoratining yangi shakli – “kengash so‘rovi” joriy etiladi.
To‘rtinchidan, 2023-yildan mualliflik huquqi obyektlarining elektron nazorat nusxalarini Yagona bazada jamlash tartibi joriy qilinadi. Bugungi kunda mualliflik huquqi obyektlari turli tashkilotlar tomonidan saqlanmoqda va ko‘p holatlarda ularning arxiv fondlari saqlanmaydi. Yagona baza orqali mualliflik huquqi obyektlarini kafolatli elektron saqlash mexanizmi yaratiladi.
Beshinchidan, Adliya vazirligi huzuridagi Huquqiy siyosat tadqiqot instituti davlat organlari va tashkilotlari faoliyatini ilmiy qo‘llab-quvvatlash uchun qonunchilik hujjatlarini qo‘llash amaliyotini joyiga chiqqan holda o‘rganadi. Mazkur islohotlar natijasida adliya organlarini boshqarish jarayonini rejalashtirish va tashkil etishga zamonaviy innovatsion uslublar, ilg‘or axborot-kommunikatsiya texnologiyalarini joriy etish darajasi kengaytiriladi.
Izoh (0)