Тошкентда 1 ҳафта муддатда «права» олиб беришини айтиб, фуқаролардан пул олган эркак ушланди

Тошкент шаҳри Янгиҳаёт туманида фуқароларни алдаб, ҳайдовчилик гувоҳномаси олиб бериш учун улардан пул олган шахс қўлга олинди. Бу ҳақда Жамоат хавфсизлиги департаменти хабар қилди.

Қайд этилишича, 16 март куни И. исмли фуқаро Янгиҳаёт тумани ИИБга ариза билан мурожаат қилган. Унда 25 февраль куни Д. (1977 йилда туғилган) исмли шахс билан танишиб қолганини, у ўзини туманнинг «Файзли» маҳалласида жойлашган Avtodriver Study МЧЖда ишлашини айтиб, ҳайдовчилик гувоҳномаси олишда қийинчилик юзага келса, ишни ҳал қилиб беришини маълум қилган. Ушбу шахс фуқарога амалий имтиҳондан ўтказиб, 1 ҳафтада ҳайдовчилик гувоҳномаси олиб беришни ваъда қилган. Эвазига 200 минг сўм сўраб, пул ва имтиҳонга кириш ҳуқуқини берувчи ҳужжатларини олган. Фуқаро Д. исмли шахс ваъдасини бажармай, алдаб юрганини билдириб, унга нисбатан қонуний чора кўришни сўраган.

Шунингдек, шу куни А. исмли шахс ҳам Янгиҳаёт туман ИИБга ариза билан мурожаат қилган. Унда 25 февраль куни Д. исмли шахс билан танишгани, у ўзини автомактаб ходими деб таништирганини ва «права» олиб беришни айтганини маълум қилган. У фуқародан 400 минг сўм ва имтиҳон ҳужжатларини олган. Бир ҳафтада гувоҳнома олиб беришини айтиб, алдаб юрган. Фуқаро ушбу шахсга нисбатан қонуний чора кўришни сўраган.

Юқоридаги ҳолатлар юзасидан Жиноят кодексининг 168-моддаси (фирибгарлик) билан жиноят иши қўзғатилди. Ҳозирда терговга қадар текширув ишлари олиб борилмоқда.

Эслатиб ўтамиз, 16 март куни Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов Ягона имтиҳон маркази имтиҳонларида коррупциявий ҳолатлар йўқлигини айтиб, фуқароларни фирибгарлардан огоҳ бўлишга чақирганди. «Шиоримиз шуки, билимингиз бўлсагина, ҳайдовчилик гувоҳномасини оласиз ва рулга ўтирасиз. Ҳозирда фақат билим, билим, билим! Бошқачасига иложи йўқ», — деган у.