Sirdaryo viloyatining Sardoba tumanida fuqarolar nomiga kredit ajratib, pullarni o‘z maqsadlari yo‘lida sarflagan shaxslar aniqlandi, deb xabar beradi Bosh prokuratura huzuridagi departamenti.
Ma’lum qilinishicha, departamentning Sardoba tumani bo‘limi tomonidan AT “Xalq banki” Sardoba filialining murojaatiga asosan tergovga qadar tekshiruv o‘tkazilgan. Tekshiruvda “Xalq banki” Sardoba filiali sobiq xodimlari A.M., N.S., O.T. va boshqalar o‘zaro til biriktirib, 54 nafar fuqaroning xabardorligisiz ular nomiga 1,2 milliard so‘m kredit ajratib, o‘zganing mulkini firibgarlik yo‘li bilan qo‘lga kiritgani aniqlangan. Shuningdek, ular 7 nafar bank mijozlari tomonidan kredit qarzdorligini so‘ndirish maqsadida topshirilgan 18 million so‘m naqd pulni bank kassasiga kirim qilmasdan, shaxsiy ehtiyojlari uchun sarflab yuborgan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Bundan oldin, Toshkentda o‘zgalar nomiga 900 mln so‘mga yaqin onlayn kredit olgan shaxs aniqlangani, Andijonda 470 mln so‘m kredit mablag‘ini talon-toroj qilgan bank xodimlariga nisbatan jinoyat ishi qo‘zg‘atilgani, Jizzaxda o‘zgalar nomiga 120 mln so‘m kredit rasmiylashtirib, uni o‘zlashtirgan “Mikrokreditbank” xodimiga jinoyat ishi ochilgani to‘g‘risida xabar berilgandi.
Izoh (0)