O‘zbekistonda haydovchilik guvohnomasini yangisiga almashtirish muddati 2023-yilning dekabriga qadar uzaytirilishi kutilmoqda

O‘zbekistonda mashina haydash huquqini beruvchi guvohnomalarni yangi namunadagisiga almashtirish muddati 2023-yilning dekabr oyiga qadar uzaytirilishi mumkin, deb xabar bermoqda Davlat xizmatlari agentligi.

Dastlabki hisob kitoblarga ko‘ra, har bir guvohnoma almashtirish punktiga kuniga 55-60 nafardan fuqaro murojaat qilganda to‘liq qamrov uchun o‘rtacha 4 yil vaqt sarf qilinishi rejalashtirilgan edi. Hozirda esa bir kunda 500-600 nafar fuqaro murojaat qilmoqda.

Qolaversa, haydovchilik guvohnomalarini yangisiga almashtirish hajmini yil davomida bir maromda taqsimlash, ularning yil yakunida almashtirish joylarida to‘planib qolishlarining oldini olish maqsadida guvohnomalarni almashtirishning yakuniy muddatlari tabaqalashtirildi (masalan, 2010-yilgacha olingan guvohnomalar – 2022-yilning apreliga qadar, 2012-yilgachalari – 2022-yilning iyul oyiga qadar va hokazo). Ushbu muddatlarda almashtirilmagan haydovchilik guvohnomalari haqiqiy emas deb topilishi belgilandi.

Haydovchilik guvohnomalarini yangisiga almashtirish uchun vakolatli idora Ichki ishlar vazirligining YHX tuman va tumanlararo bo‘limlari hisoblanadi. Haydovchilarga qulay sharoit yaratish maqsadida 2018-yilning may oyidan eksperimental tartibda Davlat xizmatlari markazlarida ham “prava” almashtirish xizmati yo‘lga qo‘yildi. Bunda xizmat uchun nafaqat kelgan holda, balki onlayn shaklda ham murojaat qilish imkoni yaratildi. Bugungi kunda jami 74 ta punktda xizmat ko‘rsatish imkoniyati yaratilib, tegishli moddiy-texnikaviy baza bilan ta’minlangan (qurilmalarning 49 tasi – YHXBB bo‘linmalari, 25 tasi Davlat xizmatlari markazlariga o‘rnatilgan).

Amalga oshirilgan ishlar natijasida yangi namunadagi haydovchilik guvohnomasi amaliyotga kiritilgan paytdan boshlab, bugungi kunga qadar 2,6 milliondan ortiq haydovchilaring guvohnomalari yangisiga almashtirildi. Davlat xizmatlari agentligi poytaxtda va viloyatlardagi haydovchilarga qulaylik yaratish maqsadida “so‘nggi mijozgacha” ish rejimini yo‘lga qo‘ydi. Ma’lumot uchun, DXMlarda o‘rtacha bir fuqaroga xizmat ko‘rsatish uchun 4-5 daqiqa vaqt sarflanmoqda.

Biroq, o‘tkazilgan tahlillar 3,1 milliondan ortiq fuqaro tomonidan hujjatlarni almashtirilmay kelinganini ko‘rsatdi. Muammoni bartaraf etish uchun quyidagi choralar qo‘llaniladi:

• haydovchilik guvohnomasini almashtirishning oxirgi muddatlarini mutanosib tarzda – 2023-yilning 31-dekabriga qadar o‘zaytirish bo‘yicha chora-tadbirlar belgilanmoqda;
• haydovchilik guvohnomalari almashtirilmagan fuqarolar sonidan kelib chiqib, tashrif buyuruvchilarning tahminiy soni va asosli talabini inobatga olib, haydovchilik guvohnomasini almashtirish punktlarini kamida ikki barobarga ko‘paytirish.

Shuningdek, IIV ma’lumotiga ko‘ra, 2022-yilning 1-aprelidan boshlab haqiqiy emas deb topiladigan haydovchilik guvohnomalari bo‘yicha, istisno tariqasida tegishli ta’sir choralari qo‘llanilmaydi.

Eslatib o‘tamiz, hukumatning 2021-yil 17-noyabrdagi qarori bilan eski haydovchilik guvohnomasini yangi namunadagisiga almashtirishning so‘nggi muddati 2021-yili dekabr oyidan 2022-yil 31-dekabrga qadar uzaytirilgandi.