Senat yalpi majlisida Qashqadaryo viloyati Chiroqchi tumanining chegaralarini o‘zgartirish va Ko‘kdala tumanini tashkil etish to‘g‘risida qaror qabul qilindi, deya xabar bermoqda “Daryo” muxbiri.
Ma’lum qilinishicha, Chiroqchi tumanida yashayotgan aholiga qulaylik yaratish, urbanizatsiya jarayonlarini tartibga solish va aholi bandligini ta’minlash maqsadida, ushbu tumanning bir qismida Ko‘kdala tumanini tashkil etish hamda uning markazini Yettitom shaharchasi etib belgilash nazarda tutilmoqda.
Senator Qutbiddin Burhonov “Daryo” muxbiriga bergan intervyusida Chiroqchi hududining kattaligi aholiga doimiy qiyinchilik tug‘dirib kelgani haqida gapirdi.
“Chiroqchi — O‘zbekistondagi eng katta tumanlardan biri. Misol qilib aytsam, bu tumanning hududi Andijon viloyatidan ham katta. Shuning uchun aholiga xizmat ko‘rsatish murakkab, elektr, gaz, suv ta’minotida muammolar ko‘p. Tumanni ikkiga bo‘lish esa bu muammolarga yechim bo‘la oladi. Masalan, Chiroqchi markaziga borib, davlat tashkilotlariga murojaat qilish uchun 100 kilometr masofa bosish kerak. Tug‘ilish bor, o‘lim bor. Odamlarning tuman markazida turli yumushlari bo‘ladi. Ayniqsa, yo‘llar va transport masalalari juda og‘riqli. Ba’zida chekka qishloq aholisi markazga borsa, kun o‘tib ketib (masofa uzoqligidan), ertasiga uyiga qaytishga majbur bo‘ladi. Tuman hududining ikkiga bo‘linishi masofani 50 kilometrga qisqartiradi”, — dedi senator.
Majlisda aytilishicha, Chiroqchi tumanida istiqomat qilayotgan 420 ming nafar aholining 176 ming 300 nafari, ya’ni 32 ta mahallada yashayotgan qismi Ko‘kdala tumani tarkibiga o‘tkazish rejalashtirilmoqda.
Shuningdek, Ko‘kdala tumani tarkibiga 162 ta sanoat korxonasi va 1 ta kichik sanoat zonasi (Ayritom) o‘tkazilib, ishlab chiqariladigan mahsulot hajmining tuman sanoatidagi ulushi 151,9 mlrd so‘mni yoki 38 foizni tashkil etadi.
“Ayritom” kichik sanoat zonasining 7 gektar maydoniga muhandislik-infratuzilma obyektlari qurilib, yangi ishlab chiqarish quvvatlari yaratiladi. Xalqaro ahamiyatdagi 94 kilometr yo‘l bo‘yida 150 ta xizmat ko‘rsatish obyektlari (516 ta ish o‘rni), Yettitom hududidan o‘tgan A-378 avtomagistral yo‘li yoqasida 6 gektar yerda xizmat ko‘rsatish va savdo komplekslari tashkil etiladi. 10 ming gektar lalmi va adir yerlarda tomchilatib sug‘orish texnologiyasi asosida bog‘-tokzorlar quriladi. Natijada Ko‘kdala tumani tarkibiga o‘tkazilayotgan aholiga qulay sharoitlar yaratiladi hamda tumanning ijtimoiy-iqtisodiy salohiyati oshishiga xizmat qiladi.
Ma’lumot uchun, Chiroqchi tumaniga 1926-yilda asos solingan. Hudud aholisi 420 ming kishini, umumiy yer maydoni 2,8 ming kvadrat metrni tashkil etadi. Chiroqchi tumani 2021-yilda aholi jon boshiga sanoat mahsulotlari ishlab chiqarish (1,8 million so‘m), qishloq xo‘jaligi mahsulotlari ishlab chiqarish (8,2 million so‘m), xizmatlar hajmi (1,8 million so‘m) bo‘yicha Qashqadaryo viloyatida eng oxirgi o‘rinni egallagan.
Eslatib o‘tamiz, Shavkat Mirziyoyev 2021-yil 24-oktabr kuni bo‘lib o‘tgan prezidentlik saylovi avvalida 2021-yilning 11-oktabr kuni qashqadaryolik saylovchilar bilan uchrashgandi. Uchrashuvda prezidentlikka nomzod sifatida saylovchilar bilan ko‘rishgan Shavkat Mirziyoyev Chiroqchi hududi kattaligi, viloyatning qariyb yarim million aholisi shu hududda yashashini, tuman markaziga yetib olish 2–3 soat vaqt talab etishini inobatga olgan holda tuman negizida Chiroqchi va Ko‘kdala tumanlarini tashkil etish taklifini bildirgandi. Shuningdek, Xalq deputatlari Chiroqchi tuman Kengashining 2021-yil 18-noyabrdagi qaroriga ko‘ra, Chiroqchi tumanidagi 32 ta mahalla yangi tashkil etiladigan Ko‘kdala tumaniga o‘tkazilishi ma’lum qilingandi.
Izoh (0)