Президентнинг «Фуқароларнинг ҳуқуқ ва эркинликларини таъминлаш ҳамда ҳуқуқий хизмат кўрсатишда адлия органлари ва муассасалари фаолияти самарадорлигини янада ошириш чора-тадбирлари тўғрисида»ги фармони қабул қилинди. Бу ҳақда Адлия вазирлиги «Дарё»га маълум қилди.
Қайд этилишича, фармон билан қуйидаги асосий ўзгартиришлар амалга оширилмоқда. Биринчидан, адлия тизимида ягона бошқарувни жорий қилиш учун Давлат хизматлари агентлиги ва Интеллектуал мулк агентлиги бевосита Адлия вазирлигига, уларнинг ҳудудий тузилмалари эса ҳудудий адлия органларига қўшилди. Натижада бошқарув ходимлари сони 110 тага яъни 2,2 фоизга (биргина марказий аппарат 10 фоизга, яъни 356 тадан 320 тага) қисқартирилди. Қисқартирилаётган штатларнинг асосий қисмини раҳбар лавозимлар ташкил қилади.
Ҳудудлардаги Давлат хизматлари бошқармалари ҳамда Интеллектуал мулк марказлари ҳудудий адлия бошқармалари таркибига ўтказилди. Тумандаги давлат хизматлари марказлари, ФҲДЁо органлари ва юридик хизмат кўрсатиш марказлари туман адлия бўлимлари билан бирлаштирилиб битта бинода фаолият юритувчи ягона Адлия бўлимларига айлантирилди, унинг таркибида интеллектуал мулк объектларини муҳофаза қилиш бўйича алоҳида масъуллар фаолият юритади. Бу орқали интеллектуал мулк объектларини туман даражасида тезкор ҳимоя қилиш, аҳолининг турли ҳуқуқий муаммоларини битта идорага ташриф буюриб ҳал қилиб кетишига эришилади.
Иккинчидан, вазирлик тизимидаги бир-бирини такрорловчи вазифа ва функциялар қайта кўриб чиқилиб, қисқартирилди. Вазирлик тизимидаги бошқарув тузилмалари 666 тадан 222 тага (67 фоизга), бир-бирини такрорловчи вазифалар 35 тадан 23 тага (34 фоизга) ва функциялар 388 тадан 215 тага (46 фоизга) қисқармоқда. Такрорловчи вазифа ва функцияларнинг қисқартирилиши бевосита ходимлар иш унумдорлиги ошишига, фуқароларнинг мурожаатлари тез ва самарали ҳал этилишига ёрдам беради.
Учинчидан, Адлия вазирлиги фаолияти самарадорлигини янада ошириш ҳамда рақамлаштириш бўйича чора-тадбирлар дастури тасдиқланди. Дастур доирасида бир-бирига боғлиқ бўлган давлат хизматларини, жумладан, кўчмас мулк ҳамда манзилга рўйхатга қўйиш, ногиронлик ва турли касалликларга оид нафақалар тайинлашни композит тарзда, яъни бир вақтда кўрсатиш тизимини жорий этиш орқали аҳолининг сарсонгарчилиги олди олинади. 1990—2016 йиллар оралиғида қабул қилинган ҳукумат қарорлари хатловдан ўтказилади ва уларнинг бугунги кундаги аҳамияти таҳлил қилиниб, фуқароларга ва тадбиркорларга енгиллик яратиш нуқтаи-назаридан қайта кўриб чиқилади.
Шунингдек, «э-шартнома» тизими ягона электрон портали яратилади, бу тизим орқали тадбиркорлар онлайн равишда турли шартнома намуналарини бепул олиши мумкин бўлади ҳамда шартномавий-ҳуқуқий муносабатларда ягона ҳуқуқни қўллаш амалиёти вужудга келади. Халқ депутатлари кенгашларининг ҳудудлардаги ислоҳотлар устидан назоратини кучайтириш мақсадида депутатлик назоратининг янги шакли – «кенгаш сўрови» жорий этилади.
Тўртинчидан, 2023 йилдан муаллифлик ҳуқуқи объектларининг электрон назорат нусхаларини Ягона базада жамлаш тартиби жорий қилинади. Бугунги кунда муаллифлик ҳуқуқи объектлари турли ташкилотлар томонидан сақланмоқда ва кўп ҳолатларда уларнинг архив фондлари сақланмайди. Ягона база орқали муаллифлик ҳуқуқи объектларини кафолатли электрон сақлаш механизми яратилади.
Бешинчидан, Адлия вазирлиги ҳузуридаги Ҳуқуқий сиёсат тадқиқот институти давлат органлари ва ташкилотлари фаолиятини илмий қўллаб-қувватлаш учун қонунчилик ҳужжатларини қўллаш амалиётини жойига чиққан ҳолда ўрганади. Мазкур ислоҳотлар натижасида адлия органларини бошқариш жараёнини режалаштириш ва ташкил этишга замонавий инновацион услублар, илғор ахборот-коммуникация технологияларини жорий этиш даражаси кенгайтирилади.
Изоҳ (0)