Bugungi kunda mamlakatda naqd dollar yoki yevro taqchilligi holatlari kuzatilmayapti. Bu haqda Markaziy bank raisi Mamarizo Nurmuratov xabar berdi.
Uning aytishicha, tijorat banklari ichki bozorda naqd xorijiy valyuta yetarliligini ta’minlab kelmoqda. Mavjud naqd valyuta zaxiralari o‘rtacha 3-4 oylik naqd ayirboshlash operatsiyalariga bo‘lgan talabni to‘liq qondira oladi.
2020-yilda pandemiyaning boshlang‘ich davrida aviaqatnovlar bo‘yicha aksariyat davlatlar tomonidan kiritilgan cheklovlar sababli tijorat banklari tomonidan naqd xorijiy valyutaning mustaqil olib kelinishi qiyinlashgan edi. Bunday vaziyatda Markaziy bank tomonidan naqd xorijiy valyutani olib kelish jarayonini markazlashgan holda tashkil etilib, tijorat banklariga taqdim etilgan.
Kelgusida taqchillik vaziyatlari yuzaga keladigan bo‘lsa, albatta, naqd valyutani markazlashgan tartibda olib kelish bo‘yicha zaruriy choralar ko‘riladi, — deydi Markaziy bank raisi.Hozir jismoniy shaxlar uchun naqd xorijiy valyutani O‘zbekistondan olib chiqib ketish 100 mln so‘m ekvivalentidan oshmagan summada amalga oshirilishi mumkin, yuridik shaxslar uchun naqd xorijiy valyutani mamlakat hududidan olib chiqib ketish taqiqlangan. Ushbu talab norezidentlar uchun ham amal qiladi.
Bugungi kunda naqd xorijiy valyuta amaliyotlari bo‘yicha qo‘shimcha talablar yoki cheklovlar kiritilishi rejalashtirilmagan, — dedi Mamarizo Nurmatov.Uning fikricha, o‘rta muddatli istiqbolda kapital oqimini liberallashtirish, mahalliy va xorijiy investorlarni jalb qilish uchun qulay shart-sharoitlar yaratish, moliya bozorlarini takomillashtirish bo‘yicha islohotlarni jadallashtirish bo‘yicha ishlar amalga oshiriladi.
Inflyatsiyani targetlash rejimiga o‘tayotgan O‘zbekiston uchun to‘g‘ridan to‘g‘ri valyuta cheklovlarining joriy etilishi orqaga qadam bo‘ladi, — deb ta’kidladi u.Avvalroq Markaziy bank asosiy stavkani 3 foizga oshirib, 17 foizga ko‘targani haqida xabar berilgan edi.
Izoh (0)