Oliy va o‘rta maxsus ta’lim vaziri Abduqodir Toshqulov oliy ta’lim ilmiy salohiyat o‘sayotganiga shubha qiluvchilarga munosabat bildirdi, deb xabar bermoqda vazirlik matbuot xizmati.
“Yoshi ulug‘lar, 70—80 yoshdan oshganlar mudir bo‘lishi, ta’limda ishlashi to‘g‘rimi, yo‘qmi degan ko‘p tortishuvlar bo‘ladi. Men bunga bitta javob beraman: agarda u shu yoshgacha ilm bilan shug‘ullangan odam bo‘lsa, u bizga juda kerak. Lekin 50−60 yoshdan keyin faqat guruhbozlik, kelgan rahbarni ishlatmaslik, uning faoliyatiga to‘sqinlik qilish bilan shug‘ullansa, ilm yo‘q u yerda”, — deydi vazir.
Toshqulovning ta’kidlashicha, so‘nggi yillarda respublika bo‘yicha ilmiy darajali pedagoglarning ulushi muntazam o‘sib kelmoqda. Oliy ta’lim tizimida 2016-yilda ilmiy darajalilar soni 7766 nafarni tashkil bo‘lsa, hozirda ularning soni 12 686 nafarga yetgan, ya’ni 38 foizga ko‘paygan.
“Ibora qilib aytadigan bo‘lsak, 5 yilda tizimga 5000 olim qo‘shilyapti. Lekin ilmiy salohiyatimiz qamrovi oshgani hisobiga atigi 2 foizga ko‘tarilyapti”, — deydi Abduqodir Toshqulov.
Bundan tashqari, vazir 23 ta OTMning ilmiy ishlar va innovatsiyalar hamda xalqaro hamkorlik yo‘nalishi bo‘yicha prorektorlari vazirlikka tasdiqlanmagan ma’lumot taqdim etganini tanqid qilgan.
“Har bir yig‘ilishni o‘tkazishdan oldin boshqarmalardan men berilgan ma’lumotlar tasdiqlanganmi, deb talab qilaman. Vazirlikka yetib kelguncha bu hujjatlarning hammasiga rektorlar imzo qo‘yib bergan. Tekshirsak, osmondan olingan raqamlar. Men tushunaman, rektorda mingta tashvish bordir, lekin prorektor nega 50−100 foiz ustama bilan oylik olyapti?” — deydi vazir.
“Prezidentimiz OTMlar sonini ko‘paytirishni faqat poytaxt misolida qilmadi. Har bir hududda bitta oliy ta’lim muassasasi 6 taga yetdi. Bu faqat oliy ta’lim bilan qamrov ko‘rsatkichi uchun emas. Bu o‘sha yerda ilmni rivojlantirish, ilm ahli hududni rivojlantirishda ishtirok etsin deb qilingan siyosat. Lekin ming afsus bo‘lsinki, o‘ziga xos bo‘lmagan topshiriqlar berilyapti. Ta’lim bu ta’limdek bo‘lishi kerak. Agar biz indamay yuraversak, erta-indin qasamyod qabul qilganga o‘xshab kechirim ham so‘rarmiz, balki biror kishidan”, — deydi Toshqulov.
Eslatib o‘tamiz, oliy va o‘rta maxsus ta’lim vaziri Abduqodir Toshqulov va Ta’lim sifatini nazorat qilish davlat inspeksiyasi boshlig‘i Ulug‘bek Toshkenboyev boshchiligida 1-fevraldan boshlab tuzilgan ishchi guruh respublika oliy ta’lim muassasalarini kompleks o‘rganmoqda. Avvalroq ishchi guruh Qashqadaryo viloyatidagi OTMlarni o‘rganishdan so‘ng talabalarga Telegram orqali dars berilganini tanqid qilgandi.
Izoh (0)