Олий ва ўрта махсус таълим вазири Абдуқодир Тошқулов олий таълим илмий салоҳият ўсаётганига шубҳа қилувчиларга муносабат билдирди, деб хабар бермоқда вазирлик матбуот хизмати.
«Ёши улуғлар, 70—80 ёшдан ошганлар мудир бўлиши, таълимда ишлаши тўғрими, йўқми деган кўп тортишувлар бўлади. Мен бунга битта жавоб бераман: агарда у шу ёшгача илм билан шуғулланган одам бўлса, у бизга жуда керак. Лекин 50−60 ёшдан кейин фақат гуруҳбозлик, келган раҳбарни ишлатмаслик, унинг фаолиятига тўсқинлик қилиш билан шуғулланса, илм йўқ у ерда», — дейди вазир.
Тошқуловнинг таъкидлашича, сўнгги йилларда республика бўйича илмий даражали педагогларнинг улуши мунтазам ўсиб келмоқда. Олий таълим тизимида 2016 йилда илмий даражалилар сони 7766 нафарни ташкил бўлса, ҳозирда уларнинг сони 12 686 нафарга етган, яъни 38 фоизга кўпайган.
«Ибора қилиб айтадиган бўлсак, 5 йилда тизимга 5000 олим қўшиляпти. Лекин илмий салоҳиятимиз қамрови ошгани ҳисобига атиги 2 фоизга кўтариляпти», — дейди Абдуқодир Тошқулов.
Бундан ташқари, вазир 23 та ОТМнинг илмий ишлар ва инновациялар ҳамда халқаро ҳамкорлик йўналиши бўйича проректорлари вазирликка тасдиқланмаган маълумот тақдим этганини танқид қилган.
«Ҳар бир йиғилишни ўтказишдан олдин бошқармалардан мен берилган маълумотлар тасдиқланганми, деб талаб қиламан. Вазирликка етиб келгунча бу ҳужжатларнинг ҳаммасига ректорлар имзо қўйиб берган. Текширсак, осмондан олинган рақамлар. Мен тушунаман, ректорда мингта ташвиш бордир, лекин проректор нега 50−100 фоиз устама билан ойлик оляпти?» — дейди вазир.
«Президентимиз ОТМлар сонини кўпайтиришни фақат пойтахт мисолида қилмади. Ҳар бир ҳудудда битта олий таълим муассасаси 6 тага етди. Бу фақат олий таълим билан қамров кўрсаткичи учун эмас. Бу ўша ерда илмни ривожлантириш, илм аҳли ҳудудни ривожлантиришда иштирок этсин деб қилинган сиёсат. Лекин минг афсус бўлсинки, ўзига хос бўлмаган топшириқлар бериляпти. Таълим бу таълимдек бўлиши керак. Агар биз индамай юраверсак, эрта-индин қасамёд қабул қилганга ўхшаб кечирим ҳам сўрармиз, балки бирор кишидан», — дейди Тошқулов.
Эслатиб ўтамиз, олий ва ўрта махсус таълим вазири Абдуқодир Тошқулов ва Таълим сифатини назорат қилиш давлат инспекцияси бошлиғи Улуғбек Тошкенбоев бошчилигида 1 февралдан бошлаб тузилган ишчи гуруҳ республика олий таълим муассасаларини комплекс ўрганмоқда. Аввалроқ ишчи гуруҳ Қашқадарё вилоятидаги ОТМларни ўрганишдан сўнг талабаларга Telegram орқали дарс берилганини танқид қилганди.
Изоҳ (0)