Ukrainadagi urush o‘n to‘qqiz kundan buyon davom etmoqda. 14-mart kuni Rossiya va Ukraina muzokaralarning navbatdagi raundini o‘tkazdi va bir kunlik tanaffus qildi. Donetsk markazida raketa portlashi oqibatida 20 kishi halok bo‘ldi, 28 kishi yaralandi. Kreml Ukraina shaharlariga hujum qilish bilan, Rossiya Mudofaa vazirligi korxonalarga bomba yog‘dirish bilan tahdid qilmoqda. “Birinchi kanal” muharriri Marina Ovsyannikova kechki yangiliklarda urushga qarshi plakat bilan chiqdi. Unda “Urushga yo‘q. Urushni to‘xtating. Propagandaga ishonmang. Bu yerda sizni aldashyapti. Rossiyaliklar urushga qarshi” degan yozuvlar bor. Meduza 14-mart, urushning o‘n to‘qqizinchi kunidan asosiy voqealar va fotosuratlarni jamladi.
Donetsk markazida raketa portlashi oqibatida 20 kishi halok bo‘ldi, yana 28 kishi yaralandi. Rossiya Mudofaa vazirligiga ko‘ra, u yerga Ukrainaning millatchi bo‘linmalari nazorati ostidagi Krasnoarmeysk shahridan “Tochka-U” raketasi uchirilgan. Raketa urib tushirilgan, biroq uning bo‘laklari Donetsk markazida Hukumat uyi yaqinidagi turar joy hududiga, Universitet va Artem ko‘chalariga qulagan.
Donetsk rasmiylariga ko‘ra, raketa taqiqlangan kasseta zaryadi bilan uchirilgan. Rossiya mudofaa vazirligi bunday o‘q-dorilardan foydalanish imkon qadar ko‘proq tinch aholini o‘ldirish maqsadini isbotlaydi, deb ta’kidlamoqda.
Ukraina Mudofaa vazirligi Donetskdagi raketaning qulashiga aloqasi yo‘qligini aytdi. “Shuni aytmoqchimanki, bu, shubhasiz, Rossiya raketasi yoki boshqa qandaydir o‘qlar”, — dedi vazirlik vakili, lekin so‘zlariga dalil keltirmadi.
Kreml Ukraina shaharlariga hujum qilish bilan, Rossiya Mudofaa vazirligi esa korxonalarga bomba yog‘dirish bilan tahdid qilmoqda. Rossiya prezidentining matbuot kotibi Dmitriy Peskov jurnalistlar uchun o‘tkazilgan brifingda G‘arb Rossiyani “tinch aholining o‘limida javobgarlikka tortish uchun” Ukrainaning yirik shaharlariga hujum qilishga undayotganini aytdi. U “maxsus operatsiya” boshida Vladimir Putin aholi punktlariga hujum qilishdan tiyilishga ko‘rsatma berganini eslatdi, biroq unga ko‘ra, endi Mudofaa vazirligi “deyarli qurshab olingan shaharlarni to‘liq nazorat ostiga olish imkoniyatini istisno etmayapti”.
Rossiya Mudofaa vazirligi Donetskning o‘qqa tutilishiga javoban “Ukraina harbiy-sanoat kompleksi korxonalarini ishdan chiqarish bo‘yicha tezkor choralar ko‘rishini” ma’lum qildi. Zarbalar “millatchilarning urush jinoyatlarini sodir etishda ishlatadigan qurollarni ishlab chiqarish, ta’mirlash va tiklash” amalga oshirilayotgan obyektlarga beriladi. Shu munosabat bilan vazirlik ushbu korxonalarda ishlaydigan yoki ularga yaqin atrofda yashovchi Ukraina fuqarolarini “potensial xavfli zonalarni tark etishga” chaqirdi.
Rossiya “Birinchi kanal”i muharriri jonli efirda urushga qarshi namoyish bilan chiqdi. “Vremya” dasturining kechki sonini olib borayotgan boshlovchining ortida kutilmaganda urushga qarshi plakat ko‘targan ayol paydo bo‘ldi. Plakatda ingliz va rus tillarida “Urushga yo‘q. Urushni to‘xtating. Propagandaga ishonmang. Bu yerda sizni aldashmoqda. Rossiyaliklar urushga qarshi” deb yozilgan. Dasturning keyingi qismiga o‘tilgunga qadar ayol “Urushni to‘xtating! Urushga yo‘q!” degan so‘zlarni bir necha bor takrorlashga ulgurdi.
“OVD-Info” xabariga ko‘ra, aksiya “Birinchi kanal” xodimi Marina Ovsyannikova tomonidan tashkil etilgan. Bundan oldin u urushga qarshi mitinglarga chiqish chaqirig‘i bilan ham murojaat qilgan.
Hozir Ukrainada sodir bo‘layotgan voqealar — jinoyat. Rossiya esa tajovuzkor davlat. Va bu jinoyat uchun javobgarlik faqat bir kishining vijdoniga havola. Bu odam Vladimir Putin. Afsuski, so‘nggi yillarda men “Birinchi kanal”da ishlayapman, Kreml propagandasi bilan shug‘ullanyapman va hozir bundan juda uyalaman. Televizor ekranida yolg‘on gapirishlariga qo‘yib berganim uyat. Men rus xalqining zombi qilinishiga jim qarab turganimdan uyalaman.
Hozir Marina Ovsyannikova hibsga olingan. “Birinchi kanal” ichki tekshiruv o‘tkazayotganini bildirdi.
14-martga oid boshqa suratlar
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)