Ukraina Vazirlar Mahkamasi xavfsiz joylarda biznes faoliyati va odamlarning bandligini ta’minlashda mamlakat iqtisodiyotini qo‘llab-quvvatlovchi qaror loyihasini ma’qulladi. Bu haqda Ukraina prezidenti Vladimir Zelenskiy o‘z murojaatida ma’lum qildi.

“Birinchi navbatda soliq islohotini boshlaymiz: QQS va daromad solig‘i o‘rniga aylanma mablag‘ning 2 foizli stavkasini va soddalashtirilgan buxgalteriya hisobini beramiz. Kichik biznes uchun — bu birinchi va ikkinchi guruh yakka tartibdagi tadbirkorlarga yagona soliqni ixtiyoriy ravishda to‘lashni taqdim etamiz. Ya’ni imkoningiz bo‘lsa — to‘lang, bo‘lmasa — muammo yo‘q”, — deydi davlat rahbari 14-mart kungi murojaatida.

Zelenskiy biznesni maksimal darajada deregulyatsiya (jamoatchilik bilan munosabatlarning ma’lum bir sohasida davlat tomonidan tartibga solishni bekor qilish yoki qisqartirish) qilishning ikkinchi asosiy talabini ham keltirib o‘tgan.

“Barcha bemalol ishlay olishi, shaharlar jonlanishi, jangovar harakatlar bo‘lmayotgan barcha joyda hayot davom etishi uchun barcha turdagi bizneslarga tekshiruvlarni bekor qilamiz. Shart faqat bitta — o‘z biznesingizni Ukraina qonunchiligi doirasida normal yuritilishi ta’minlaysiz”, — deydi Ukraina prezidenti.

Shuningdek, Zelenskiy bu soliq islohotining dastlabki ikki qadami ekanini ta’kidlagan. “Davom bor”, — deya qo‘shimcha qilgan Ukraina yetakchisi.

Avvalroq Zelenskiy Ukrainadagi Rossiya mulkini kompensatsiyasiz musodara qilish to‘g‘risidagi qonunni imzolagani, Zelenskiy Ilon Mask bilan suhbatlashib, Ukrainani qo‘llab-quvvatlayotgani uchun minnatdorlik bildirgani to‘g‘risida xabar berilgandi.