O‘zbekiston maktablarida III chorakning so‘nggi kuni 19-martga to‘g‘ri keladi va IV chorak 28-mart kunidan boshlanadi. Bu haqda Xalq ta’limi vazirligi matbuot xizmati xabar berdi.
Ma’lum qilinishicha, respublika umumta’lim maktab o‘quvchilari uchun III chorakning so‘nggi kuni 19-martga to‘g‘ri kelmoqda. Ya’ni shu kuni dars mashg‘ulotlari to‘liq olib boriladi. Bahorgi ta’til 21-martdan boshlanadi va 7 kalendar kun davom etadi.
IV chorak darslari esa 28-mart kunidan boshlanadi.
Ma’lumot uchun, Vazirlar Mahkamasining tegishli qarori bilan tasdiqlangan nizomga muvofiq, maktablarda bahorgi ta’til — 21-martdan boshlab, 7 kalendar kun davom etishi belgilangan. 2021-yilda O‘zbekiston maktablarida bahorgi ta’til 20-martdan boshlangan edi.
Eslatib o‘tamiz, O‘zbekistonda talaba va o‘quvchilar uchun qishki ta’til 25-dekabrdan boshlangandi. Ta’til 2022-yilning 10-yanvarigacha davom etishi va dars jarayonlari 11-yanvardan boshlanishi belgilangandi. Keyinroq oliy ta’lim muassasalarining talabalari, akademik litsey va hunar maktablari o‘quvchilari uchun qishki ta’til muddati 24-yanvargacha uzaytirildi. Bunga sabab qilib rektorlar, prorektorlar, dekanlar va moliya masalalariga mas’ullar uchun o‘z kasbiy mahoratini oshirish, yangicha tartibda ishlashni boshlash maqsadida 2022-yil 10—24-yanvar kunlari amaliy seminar-treninglar tashkil etilishi ko‘rsatilgan. Keyinchalik maktablarda ham, xususiy ta’lim tashkilotlarida ham qishki ta’til 24-yanvargacha uzaytirildi.
Izoh (0)