Samarqandda o‘zini bloger sifatida tanishtirib, fuqarolarning turli muammolarini pul evaziga hal qilib berishni va’da qilib, ularni chuv tushirib kelgan shaxs qo‘lga olindi. Bu haqda Samarqand viloyati IIB axborot xizmati xabar berdi.
Ma’lum qilinishicha, 35 yoshli U.Chorshanbiyev 2021-yilning avgust oyida fuqaro D.R.ga o‘zining blogerligini aytib, 600 dollar evaziga uy-joy masalasi bo‘yicha Fuqarolik ishlari bo‘yicha Past Darg‘om tuman sudida ko‘rilayotgan ishni ijtimoiy tarmoqlarga joylash orqali ijobiy hal qilib berishni va’da qilgan. U 2 million so‘m miqdoridagi pullarini olib, o‘zining ehtiyojlariga ishlatib yuborgan.
Bundan tashqari, U.Chorshanbiyev o‘zining jinoiy harakatlarini davom ettirib, 2021-yil 7-sentabr kuni fuqaro Yu.D.dan 2 ming dollar evaziga uning nohaq ishdan ketganini ijtimoiy tarmoqlarga joylash orqali unga yetkazilgan moddiy zararni qoplash va ishiga qayta tiklab berishini va’da qilgan. Undan 1 000 dollar miqdoridagi pullarini olib, o‘zining ehtiyojlariga ishlatgan.
Shuningdek, U.Chorshanbiyev 2021-yilning noyabr oyida fuqaro R.Z.ni aldab, 20 million so‘m evaziga unga sobiq turmush o‘rtog‘i bilan bo‘layotgan Fuqarolik ishlari bo‘yicha Samarqand shahar sudi tomonidan ko‘rilayotgan ishda qatnashib, muammoni ijtimoiy tarmoqlarda ko‘tarib, farzandini olib berishni va’da qilgani aniqlangan. Shuningdek, u Tergov bo‘limi tomonidan ko‘rilayotgan jinoyat ishi bo‘yicha unga yetkazilgan 14 ming dollar zararni qoplatib berishni va’da qilib, R.Z.ning 1 million so‘m pullarini firibgarlik yo‘li bilan qo‘lga kiritgan.
2021-yilning 28-dekabrida U.Chorshanbiyevga nisbatan Jinoyat kodeksining 168-moddasi (firibagarlik) 3-qismi “b” bandi bilan sirtdan ayb e’lon qilinib, unga nisbatan “sirtdan qamoqqa olish” tarzidagi ehtiyot chorasi qo‘llanilgan. Mazkur shaxsga nisbatan qidiruv e’lon qilinib, jinoyat ishi Jinoyat-protsessual kodeksining 364-moddasi 1-qismi 2-bandiga asosan harakatdan to‘xtatilgan.
Hozirda U.Chorshanbiyev Qashqadaryo viloyati hududida JQB xodimlari tomonidan ushlanib, Samarqand viloyat IIB PPX JTSBga qarashli vaqtincha saqlash hibsxonasiga joylashtirilgan.
Ushbu shaxsdan jabrlanganlar bo‘lsa, Samarqand shahar bo‘yicha IIO FMB huzuridagi Tergov bo‘limiga murojaat qilishlari so‘raladi.
Avvalroq Andijonda bog‘cha mudirasini qo‘rqitib, undan 350 dollar olgan bloger qo‘lga olingani to‘g‘risida xabar berilgandi.