Avvalroq Ukraina mamlakat hududida shakar eksportini taqiqlagani haqida xabar berilgan edi. Yaqin kunlarda xuddi shunday qaror Rossiya tomonidan ham qabul qilinadi.
Rossiya va Ukraina – O‘zbekistonga shakar yetkazib beruvchi asosiy davlatlardan biri. 2021-yili 12 davlatdan 23,2 ming tonna shakar import qilingan. Rossiya 5,3 ming tonna ko‘rsatkich bilan birinchi o‘rinni, Ukraina esa 3,4 ming tonna bilan to‘rtinchi o‘rinni egalladi.
Shuningdek, Ozarbayjon (4,6 ming tonna), Polsha (3,7 ming tonna) va Qozog‘iston (1,5 min tonna) shakar bo‘yicha yirik importchi mamlakatlar hisoblanadi.
Mahalliy ishlab chiqarish importdan ancha ko‘p
“Daryo” bilan suhbatda bo‘lgan mutaxassislar Rossiya va Ukraina shakarining yo‘q bo‘lishi O‘zbekistonga jiddiy ta’sir qilmasligini ta’kidlagan.
Birinchidan, O‘zbekiston sotib olishdan ko‘ra, ko‘proq ishlab chiqaradi. Buni statistika ham tasdiqlagan – 2021-yilning 9 oyida O‘zbekistonda 400 ming tonnadan ziyod shakar ishlab chiqarilgan (importdan 20 barobar ko‘p).
Ikkinchidan, O‘zbekiston yangi bozorlarni faol ravishda o‘zlashtirmoqda. 2021-yili, masalan, Braziliyadan shakar importi bir necha baravar o‘sgan.
Oxirgi yillarda ishlab chiqarish jadal sur’atlarda o‘smoqda, import hajmi esa tushib ketmoqda.
Yuzaga kelishi mumkin bo‘lgan xavf haqida gap ketadigan bo‘lsa, O‘zbekiston ko‘proq shakar xomashyosi importiga qaram bo‘lib, undan mahalliy zavodlar shakar ishlab chiqarishda foydalanadi.
Bundan tashqari, shakarni vaqti-vaqti bilan sotib olish, uni ishlab chiqarishdan ko‘ra foydaliroq. Masalan, 2020-yili Rossiyada qand lavlagi yig‘imi o‘sgani tufayli shakar importi hajmi ham oshgan, ham arzonlashgan edi.
Maqolani tayyorlashda Davlat statistika qo‘mitasi ma’lumotlaridan foydalanildi. “Daryo” hamkorlik uchun o‘z minnatdorligini bildiradi.
Izoh (0)