Xalqaro provayderlarning Rossiyadan ketishi tufayli O‘zbekistonda internet bilan muammolar yuzaga kelishi mumkin

Lumen magistral internet provayderi Rossiyadan ketishi haqida e’lon qildi. Dunyoning eng yirik magistrallaridan birini boshqaruvchi kompaniya Rossiya tashkilotlari bilan trafik almashinuvni to‘xtatishini ma’lum qildi.

Bundan tashqari, yana bir eng yirik asosiy internet provayderlardan biri bo‘lmish Cogent kompaniyasi ham Rossiyadan chiqib ketayotgani haqida e’lon qilgan.

Lumen va Cogent — Rossiyaning bir necha yetakchi kompaniyalari uchun xalqaro tranzit xizmatlarining yirik ta’minotchilaridir. Ularning mijozlari qatorida, masalan, “Rostelekom”, “TTK” va VEON kompaniyalari bor.

VEON va ТТК Markaziy Osiyo mamlakatlarga internet tranziti bilan shug‘ullanadi. Shunday ekan, Lumen va Cogent Rossiyadan chiqib ketishi Qozog‘iston, Tojikiston va O‘zbekiston uchun ma’lum oqibatlarga sabab bo‘ladi, — deb izohlaydi Kentik tahliliy kompaniya vakillari. 

Tahlilchilar provayderlarning ketishi Rossiya va Markaziy Osiyo mamlakatlaridagi internetning o‘chishiga sabab bo‘lmasligini, ammo internet kanallarning umumiy o‘tkazish imkoniyatini pasaytirishi va ularning ortiqcha yuklanishiga olib kelishini bildirmoqda.

Avvalroq Western Union’ning ketishi O‘zbekistonga amalga oshiriladigan pul o‘tkazmalariga ta’sir qilishi haqida xabar berilgan edi.