Yevropaliklar va amerikaliklar O‘zbekiston va boshqa mamlakatlar orqali Rossiyani tark etmoqda

The Wall Street Journal Rossiyani tark etayotgan xorijliklar haqida gapirdi.

Ulardan biri Moskvada yashagan, asli Shimoliy Dakotadan bo‘lgan Jonas Ness o‘z hisobidagi hamma pulni yechgan va Sankt-Peterburg yo‘nalishidagi kechki poyezdga o‘tirib, u yerdan Estoniyaga jo‘nagan.

Men hamma naqd pulimni olib ketdim. Hozirda Rossiya bilan juda qaltis munosabatlarda bo‘lgan AQSh fuqarosi bo‘lganim uchun ham o‘z mablag‘larimni xavfsiz joyga olib ketishni istadim, — deydi Rossiyadagi xususiy aviakompaniyada texnik sifatida ishlagan Ness.

Rossiyadan chiqib ketayotgan xorijliklarning aniq sonini aytish qiyin, ammo Wall Street Journal’ning ma’lumotlariga ko‘ra, bu katta oqim. Kimdir butunlay, kimdir esa vaqtincha bu yerni tark etmoqda. 

Sabablar turlicha. Kimdir Rossiya chegaralari butunlay yopilishidan qo‘rqqani uchun bosh olib chiqib ketayotgan bo‘lsa, kimdir boshqalarga hujum uyushtirayotgan mamlakatda yashashni istamaganidan jo‘nab ketmoqda.

Men ketishni istamayman, – deb tan oladi amerikalik Kelsi Xedrik, ammo uning so‘zlariga ko‘ra, unda boshqa iloj qolmadi. Hozir u Finlyandiyaga ko‘chib ketdi.

Rossiya va G‘arb o‘rtasidagi munosabatlar doimo murakkab bo‘lganiga qaramay, Moskva va boshqa katta shaharlarda ko‘plab xorijliklar yashar edi.

Barchasi shu yilning mart oyida o‘zgarib ketdi. Amerikaning Global Guardian firmasi Amerika va Yevropaning 22 ta kompaniyasida ishlovchi 2000 dan ziyod odamga Moskva va Sankt-Peterburgdan ketishga yordam berdi. 

Rossiya, Yevropa va AQSh mamlakatlari o‘rtasidagi parvozlar taqiqlangandan so‘ng, xorijliklar tranzit mamlakatlar, shu jumladan, O‘zbekiston orqali chiqib ketishmoqda.  

WSJ Rossiyada 10 yil davomida yashab, endilikda mamlakatni tark etishga qaror qilgan britaniyalik o‘qituvchi haqida yozadi. U o‘z oilasi bilan birga Toshkentga uchadigan samolyotga o‘tirib, u yerdan Istanbulga jo‘nab ketgan.

Birovlarning qiyinchiligi boshqalar uchun yangi imkoniyat

Yaqinda Korzinka asoschisi Zafar Xoshimov Rossiya—Ukraina mojarosi O‘zbekistonga o‘z ta’sirini ko‘rsata boshlagani haqida gapirgan edi. 

Tadbirkor mutasaddilardan chet ellik mutaxassislarni O‘zbekistonga ko‘chib kelishini soddalashtirishni tavsiya qildi. 

Uning so‘zlariga ko‘ra, O‘zbekistonga kerak bo‘lgan malakali mutaxassislarni shu orqali jalb qilish mumkin.