Ukraina bir qator ijtimoiy ahamiyatga ega mahsulotlarga cheklov qo‘ydi. Bu haqda Ukraina Vazirlar mahkamasining tegishli qarorida qayd etildi.
Ro‘yxatga quyidagilar kiritildi:
- go‘sht;
- suli;
- javdar;
- grechka;
- shakar;
- sharbat;
- tuz.
Yana bir necha mahsulotlar Ukraina Iqtisodiyot vazirligining ruxsatnomasi bilangina import qilinishi mumkin:
- bug‘doy;
- jo‘xori;
- parranda go‘shti;
- tovuq tuxumi;
- kungaboqar yog‘i.
“Korzinka” do‘konlar tarmog‘i asoschisi Zafar Hoshimovning aytishicha, Ukrainadan import to‘xtab bo‘lgan.
Hozirning o‘zidanoq ushbu tovar va bozorlar o‘rniga boshqalarini topishi kerak, — deb hisoblaydi tadbirkor.
O‘zbekiston Ukrainaga nima sotadi va undan nima sotib oladi?
Ukraina O‘zbekistonning asosiy hamkori bo‘lmasa-da, uning yirik savdo sherigi hisoblanadi.
2021-yili mamlakatlar o‘rtasidagi savdo hajmi 704 mln dollarni tashkil qilgan. Ulardan 231,6 mln dollari — eksportga, 472, 4 mln dollari esa importga to‘g‘ri keladi.
O‘zbekiston Ukrainaga, asosan, kimyoviy, to‘qimachilik va oziq-ovqat mahsulotlari, rangli metall, mashina va asbob-uskunalar sotadi.
Ukraina esa O‘zbekistonga, asosan, qora metall, kimyoviy mahsulotlar, mashina va asbob-uskunalar, oziq-ovqat mahsulotlari, rangli metallar sotgan.
Go‘sht, konfetlar, shokolad va yog‘
2021-yili Ukrainadan oziq-ovqat mahsulotlari importi 63,4 mln dollarni tashkil etdi.
Mazkur ko‘rsatkich 2020-yilga nisbatan qariyb ikki baravar ko‘p bo‘lsa-da, oziq-ovqat umumiy importida Ukrainaning ulushi bor-yo‘g‘i 2,2 foizni tashkil qiladi.
Buni O‘zbekistonga kirib keladigan oziq-ovqat mahsulotlari, asosan, Qozog‘iston (34,1 foiz) va Rossiya (27,3 foiz) tomonidan ta’minlanishi orqali izohlash mumkin.
Biroq umumiy ulushda Ukraina ulushi 10 foizdan ortiq bo‘lgan bir necha tovarlar mavjud. Bular go‘sht, qandolat mahsulotlari, o‘simlik yog‘i va kakaodir.
Bundan tashqari, 2021-yili O‘zbekiston Ukrainadan yog‘ importini 5,5 baravarga, qandolat mahsulotlarini 2,2 baravarga, go‘sht mahsulotlarini esa 53,8 foizga oshirdi.
Oziq-ovqat bozori, asosan, boshqa mamlakatlarga tegishlidir
O‘zbekiston uchun oziq-ovqat importining asosiy bozorlari boshqa mamlakatlarga to‘g‘ri keladi.
Masalan, o‘simlik yog‘i 2021-yili uning importi 313,6 mln dollarni tashkil qilgan, undan 207,6 mln dollari Rossiyaga va atigi 8 mln dollari Ukrainaga tegishlidir.
Yorma va un asosan Qozog‘istondan, shakar va shokolad Braziliyadan, margarin va sut mahsulotlari Rossiyadan, mol va qo‘y go‘shtlari Belarusdan olib kelinadi.
Avvalroq Ukraina O‘zbekistonning dori-darmon bo‘yicha yirik ta’minotchilaridan biri ekanligi va uning O‘zbekiston bozordagi o‘rni Hindiston va boshqa mamlakatlar tomonidan egallanishi mumkinligi haqida xabar berilgan edi.
Izoh (0)