Қўқон шаҳар ҳокимининг 10 минг доллар пора олган биринчи ўринбосари 5 ярим йилга қамалди

Қўқон шаҳар ҳокимининг биринчи ўринбосари 10 минг доллар пора олаётганда қўлга олингани хабар қилинганди. Унда мансабдор «Қўқон минтақавий темир йўл узели» молия бўлими бошлиғи ўринбосари О.М. билан бирга ушлангани айтилганди. Уларга нисбатан суд ҳукми ўқилди, деб хабар бермоқда ЎзА.

Қайд этилишича, 180 минг доллар миқдорида пора олмоқчи бўлган Абдуҳалил Нурматов ва «Қўқон минтақавий темир йўллари узели» молия бўлими бошлиғи ўринбосари О. Мамажоновга нисбатан суд иши бўлиб ўтган. Жиноят ишлари бўйича Бешариқ туман суди томонидан мазкур жиноят иши кўриб чиқилиб, А.Нурматовга 5 йил 6 ой, О.Мамажоновга 5 йил 3 ой озодликдан маҳрум қилиш жазоси тайинланган.

Эслатиб ўтамиз, мансабдорлар жиноий тил бириктириб, бир тадбиркорга мазкур темир йўл узели балансида бўлган 2,5 гектар ер майдонидаги бино ва иншоотлар бўйича ўтказиладиган аукцион савдоларда унинг фойдасига қарор чиқартириб бериш эвазига 180 минг доллари талаб қилган. Талаб қилган пулдан 10 минг долларини олаётган пайтда улар тегишли органларнинг тезкор ходимлари томонидан қўлга олинганди. Уларга нисбатан фирибгарлик ва пора беришга қасд қилиш аломатлари билан жиноят иши қўзғатилиб, қамоққа олинган.

Кейинроқ «Қўқон минтақавий темир йўл узели» раҳбарияти мазкур ҳолатга корхонанинг мутлақо алоқаси йўқлигини маълум қилганди. Шунингдек, «Ўзбекистон темир йўллари» ҳам раддия берган — «Корхонада ҳеч қандай сотувга қўйилган ер майдони ҳам мавжуд эмас». ДХХ матбуот хизмати томонидан тасдиқланган хабарларда ҳам «Қўқон минтақавий темир йўл узели» балансидаги ер майдони ҳақида маълумот келтирилмагани қўшимча қилинган.