Fransiya prezidenti Emmanuel Makron Rossiya bilan harbiy nizo vaqtida Ukrainaning Yevropa Ittifoqi tarkibiga kirish jarayonini boshlashning imkoni yo‘q deb hisoblashi haqida gapirdi. U bu haqda Versalda YI mamlakatlari rahbarlarining sammiti oldidan jurnalistlar bilan suhbatda ma’lum qilgan.
Fransiya davlat rahbari YI sammitida uch mamlakat — Ukraina, Moldova va Gruziyaning ittifoq tarkibiga kirish uchun bergan so‘rovlari muhokama qilinadi.
“Biz hozir hududida urush ketayotgan mamlakatni YI tarkibiga qabul qilish jarayonini ochiqchasiga boshlay olamizmi? Men buning imkoni yo‘q deb hisoblayman”,— degan Makron (“RIA Novosti” keltirgan iqtibos).
Shuningdek, u Ukrainaga eshik yopish va bu hech qachon amalga oshmaydi deb aytish ham noto‘g‘ri bo‘lishini ta’kidlagan.
Makron Moldovadagi vaziyatga ham e’tibor qaratgan. U Rossiya gaziga qaram bo‘lgan ushbu mamlakat hududiga Ukrainadan o‘n minglab qochoqlar kelganini eslatgan.
“Moldovani ushbu yo‘lda qoldirib keta olmaymiz”,— deya qo‘shimcha qilgan Fransiya prezidenti.
Avval Bolgariya, Chexiya, Estoniya, Latviya, Litva, Polsha, Slovakiya va Sloveniya kabi davlatlarning prezidentlari Ukrainaning zudlik bilan YIga a’zo bo‘lish uchun nomzod mamlakat maqomini olishga haqli ekanini bayon qilgan.
Yevrokomissiya raisi Ursula fon der Lyayen Ukrainaning vaqti kelib Yevropa Ittifoqiga kirishi kerakligini qayd etgan. Ammo Yevropa Ittifoqi diplomatiyasi rahbari Jozep Borrel YI yetakchi mamlakatlarining rahbarlari ayni vaqtda Ukrainani ittifoq a’zoligiga qabul qilish masalasini ko‘rib chiqmayotganini ma’lum qilgan.
10-mart kuni Reuters agentligi YI yetakchilari ishtirokidagi sammit deklaratsiyasiga asoslanib Yevroittifoqning Ukrainadagi voqealar tufayli Rossiya nefti, gazi va ko‘miridan bosqichma-bosqich voz kechishni rejalashtirayotgani haqida xabar bergan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)