Dunyoning uchta eng yirik ovoz yozish kompaniyalari Rossiyadagi faoliyatini to‘xtatdi

Dunyo musiqa bozorining 70 foizini nazorat qiluvchi ovoz yozish leybllar katta uchligining barcha a’zolari Ukrainadagi urush tufayli Rossiyadagi faoliyatlari to‘xtaganini e’lon qildi.

10-mart kuni Sony Music Rossiyadagi faoliyati to‘xtatilganini bildirgan.

“Sony Music Group Ukrainada tinchlik o‘rnatishga va zo‘ravonlikni to‘xtatishga chorlaydi. Biz Rossiyadagi barcha biznes-operatsiyalarini vaqtincha to‘xtatdik va muhtojlarga ijtimoiy ko‘mak berishda davom etamiz”, — deyiladi kompaniya bayonotida.

Variety ma’lumotlariga ko‘ra, kompaniya xodimlari nomuayyan vaqt davomida oylik maoshlarini olishda davom etadi, artistlar bilan bog‘liq vaziyat o‘rganish va tahlil jarayonida qolmoqda.

Sony Music’dan keyin Warner Music ham Rossiyadagi faoliyati davom etmasligini ma’lum qildi.

“WMG Rossiyadagi faoliyatini, xususan, investitsiyalar va rivojlanish loyihalari, rivojlanish va marketing faoliyatini, shuningdek, o‘z jismoniy tashuvchilarini ishlab chiqarishni ham to‘xtatadi. Biz bu borada maksimal darajada o‘ylangan jiddiy qadamni qo‘yishga qaror qildik. Kelgusida xodimlarimiz, artistlar va mualliflar oldidagi majburiyatlarimizning bir qismini bajaramiz hamda vaziyatning rivojlanishiga qarab choralar ko‘ramiz”, — deyiladi Meduza’ga kelib tushgan kompaniya bayonotida.

Shuningdek, yana bir katta ovoz yozish kompaniyasi Universal Music Rossiyadagi ofislari yopilgani va 8-martdan boshlab mamlakatdagi barcha biznes-operatsiyalari to‘xtatilganini e’lon qildi.

“Biz Ukrainadagi zo‘ravonlikka chek qo‘yishga chaqiramiz. Biz AQSh, Buyuk Britaniya, Polsha, Slovakiya, Germaniya, Chexiya va Vengriyada ishlaydigan xodimlarimiz hamda artistlar bilan birgalikda xalqaro sanksiyalarni qo‘llab-quvvatlaymiz, hududdan chiqib ketgan qochoqlarga ijtimoiy yordam berish xatti-harakatlarini to‘liq qo‘llab-quvvatlaymiz”, — deyiladi ushbu kompaniya bayonotida.

Avval Western Union xalqaro pul o‘tkazish tizimi Rossiyada va Belarusdagi xizmatlarini to‘xtatgani, Visa hamda Mastercard Rossiyadagi faoliyatini to‘xtagani, shuningdek, Rossiyada ingliz tili bo‘yicha IELTS imtihonlari bekor qilingani haqida xabarlar berilgandi.