“Rossiyasiz muloqotdan zavqlanishsin”. Rossiya Yevropa Kengashida ortiq ishtirok etmasligini bildirdi

Rossiya Yevropa kengashining ishlarida ortiq ishtirok etish niyatida emas, deyiladi mamlakat Tashqi ishlar vazirligining bayonotida.

Vazirlik nuqtayi nazariga ko‘ra, Yevropa Ittifoqi va NATOning “do‘st bo‘lmagan” davlatlari Yevropa Kengashi Vazirlar qo‘mitasidagi ko‘pchilik o‘rnini suiiste’mol qilib, tashkilot va Yevropadagi umumiy gumanitar-huquqiy makonni yo‘q qilmoqda. O‘z navbatida Rossiya “bunday buzg‘unchi harakatlarga chidamoqchi emas”.

“Rossiya Yevropaning eng azaliy tashkilotini (Yevropa Kengashini — tahr.) natochilar va ular ortidan itoatkorlik bilan ergashgan Yevropa Ittifoqi tomonidan o‘zgartirilib, G‘arbning ustunligi va o‘zini sevishi haqidagi fitnalar uchun navbatdagi platformaga aylantirilishida qatnashmaydi. Ular Rossiyasiz bir-birlari bilan muloqot qilishdan zavqlanishsin”, — deyiladi bayonotda.

Tashkilot nizomiga muvofiq Rossiyaning Yevropa Kengashidagi a’zoligi joriy moliyaviy yil oxirida to‘xtatiladi, dedi Federatsiya kengashi vitse-spikeri Konstantin Kosachev. Uning so‘zlariga ko‘ra, Rossiyaning Yevropa Kengashidan chiqishi tashkilot Nizomi va Inson huquqlari bo‘yicha Yevropa konvensiyasini bir vaqtning o‘zida denonsatsiya (bekor) qilishni nazarda tutadi. Senator Andrey Klishasning qo‘shimcha qilishicha, Yevropa Kengashini tark etganidan keyin, xususan, rossiyaliklar Inson huquqlari bo‘yicha Yevropa sudiga murojaat qila olmaydi. Shu bilan birga, Rossiya TIV matbuot kotibi Mariya Zaxarova vazirlikning bayonoti Rossiyaning Yevropa Kengashidan chiqishini anglatadimi, degan savolga javob bermadi.