Энергетика вазирлиги Ўзбекистонда аҳоли билан ўзаро ҳисоб-китоб тизимини автоматлаштириш, «ақлли» газ ҳисоблагичларни ўрнатиш ишлари бўйича эришилган натижалар билан ўртоқлашди.
Қайд этилишича, республика аҳоли хонадонларига 3 миллион 546 минг 148 дона «ақлли» газ ҳисоблагич ўрнатилиши режалаштирилган. 8 март ҳолатига кўра 2 миллион 681 минг 88 та (78 фоиз) ҳисоблагич ўрнатилган. Хусусан:
- Қорақалпоғистонда— 155 029 дона (64 фоиз);
- Андижон вилоятида — 205 985 дона (93 фоиз);
- Бухоро вилоятида — 210 539 дона (80 фоиз);
- Жиззах вилоятида — 138 526 дона (96 фоиз);
- Қашқадарё вилоятида — 127 994 дона (85 фоиз);
- Навоий вилоятида — 109 510 дона (82 фоиз);
- Наманган вилоятида — 174 537 дона (106 фоиз);
- Самарқанд вилоятида — 177 722 дона (63 фоиз);
- Сурхондарё вилоятида — 92 080 дона (85 фоиз);
- Сирдарё вилоятида — 110 326 дона (104 фоиз);
- Тошкент вилоятида — 546 617 дона (92 фоиз);
- Фарғона вилоятида — 218 455 дона (73 фоиз);
- Хоразм вилоятида — 161 587 дона (72 фоиз);
- Тошкент шаҳрида — 192 181 дона (31 фоиз) замонавий табиий газ ҳисоблагич ўрнатиб бўлинган.
Эслатиб ўтамиз, 2021 йил март ойида «ақлли» газ ҳисоблагичларини ўрнатиш 2021 йил охиригача якунланиши ҳақида хабар берилган эди. Сўнгра шаҳарда 629 427 нафар чакана газ истеъмолчилари борлиги, шундан 448 073 таси кўп қаватли уйларда, 181 354 таси хусусий уйларда экани ҳақида аниқлик киритилган. Ҳисоблагичларни ўрнатиш аҳоли учун бепул. Ташкилот беш йиллик кафолатли хизматни кафолатлайди.
Президентнинг 2020 йил сентябрдаги қарори билан 2021 йил 1 августга қадар Ўзбекистоннинг барча ҳудудларида замонавий ҳисоблагичлар ўрнатган ҳолда газни мониторинг қилиш ва ҳисобга олишнинг автоматлаштирилган тизимини жорий этишни якунлаш топширилган эди.
«Gazeta.uz»нинг ёзишича, Тошкент шаҳар ҳокимлиги томонидан ташкил этилган технопаркда 2020 йил бошидан буён Osten савдо белгиси остида «ақлли» газ ҳисоблагичлар ишлаб чиқарилмоқда. Лойиҳа 2021 йил июлигача 5,28 триллион сўмлик 3,54 миллион дона электрон газ ҳисоблагичларини етказиб беришни кўзда тутади.
«Интеллектуал мулк» ахборот-қидирув тизими маълумотларига кўра, Artel Engineering, Management ва Ж-United Group компаниялари (ягона таъсисчи Тошкент шаҳар ҳокими бўлган Жаҳонгир Ортиқхўжаев) Osten товар белгисини рўйхатдан ўтказиш учун ариза топширган.
Тошкент шаҳридаги кўп қаватли ва хусусий уйларга «ақлли» газ ҳисоблагичларини ўрнатиш 2022 йил 31 январга қадар якунланиши режалаштирилган.
Изоҳ (0)