So‘x tumanidagi ziyoratgohdan 1 kiloga yaqin tilla tangalar topilgani haqidagi xabarga aniqlik kiritildi

Ijtimoiy tarmoqlarda Farg‘ona viloyatining So‘x tumanidagi Hazrat Ali ziyoratgohidan xum ichida tilla tangalar topilgani haqida xabarlar tarqaldi. Xabarda aytilishicha, 2021-yilning 8-sentabr kuni tumanning “Hazrat Ali” mahalla fuqarolar yig‘inida joylashgan Hazrat Ali ziyoratgohida joylashgan eski hovuz hashar yo‘li bilan ta’mirlash ishlari amalga oshirilgan. Ta’mirlash jarayonida ichida oltin tangalari bor xum topilgan. Xumdagi tilla tangalarning umumiy og‘irligi taxminan 1 kilogramm atrofida bo‘lgan.

“Daryo” muxbiri mazkur ma’lumotga oydinlik kiritish maqsadida So‘x tumani hokimligi bilan bog‘landi. Tuman hokimligi axborot xizmati rahbari Anvar Jo‘rayevning ma’lum qilishicha, qadimiy ziyoratgohdan tilla tangalar topilgani haqida rasmiy ma’lumot mavjud emas.

“Ijtimoiy tarmoqlarda va internet nashrlarida Hazrat Ali ziyoratgohidan ichida tilla tangalar bo‘lgan xum topilgani haqidagi xabarlarni eshitib, mahalla raisi bilan gaplashdim. Qadimiy ziyoratgohdan hech qanday qadimiy buyum yoki tilla tanga topilmagan ekan”, — deydi Anvar Jo‘rayev.

“Hazrat Ali” mahalla fuqarolar yig‘ini raisi, tuman kengashi deputati Subhonali Nishonov ham qadimiy ziyoratgohdagi hovuzni ta’mirlash vaqtida xum ichida tilla tangalar topilgani haqidagi ma’lumotlarni rad etdi.