Сурхондарё вилоятининг Сариосиё туманида темурийлар даврига оид мис тангалар топилди. Бу ҳақда «Дарё»га журналист Сарвар Тўраев маълум қилди.
Вилоятнинг Сариосиё тумани «Алишер Навоий» маҳалласида яшовчи маҳаллий аҳоли Тўполондарё ёқасидан қадимий тангалар топиб, бу ҳақда туман ҳокимлигига маълум қилган.
«Тўполондарё Жанубий Ҳисор тоғ тизмасидан бошланувчи йирик сув сиғимига эга дарё бўлиб, Сариосиё туманининг ‘Алишер Навоий’ маҳалласи ҳудудига етиб келганда анча саёзлашади. Дарё айни кунда бутунлай қуриб қолгани боис, шу маҳаллада яшовчи аҳоли дарёдан тош олиб чиқиб, қурилишда фойдаланади. Шундай кунларнинг бирида одамлар тошлар орасидан тангалар топиб олган», — дейди Туризм ва маданий мерос вазирлиги ҳузуридаги маданий мерос агентлиги раҳбари ўринбосари Турсунали Қўзиев.
Турсунали Қўзиев Сариосиёдан топилган мис танга пуллар 1420—1436 йилларда Самарқандда зарб қилинганини айтмоқда.
«Бу мис тангаларнинг металл сифатида аҳамияти кам бўлиши мумкин, аммо тарихий аҳамияти юқори. Аслида, темурийлар, хусусан, Мирзо Улуғбек даврида зарб қилинган бу каби танга пуллар кўп топилади. Лекин, бу мис танга пуллар анчагина яхши сақланган экан. Дарё қирғоғидан топилган бу тангалар Улуғбек ҳукмронлигининг турли даврларида 1420—1436 йиллар оралиғида Самарқандда зарб қилинган. Тангаларда олти қиррали юлдуз ва турли астрономик белгилар акс этган. Бу ҳукмдорнинг ўзи бевосита ушбу тангаларни зарб этишда бош-қош бўлганлиги, ўша даврда математика ва астрономия юқори даражада ривожланганлигини кўрсатади. Тангалар юза қисмида зарб қилинган жой номи ‘Самарқанд’, шунингдек, ‘адлия’, яъни ‘адолат’ сўзи акс этган», — дейди маданий мерос агентлиги масъули.
Изоҳ (0)