Shavkat Mirziyoyev 2 mart kuni BMT bosh kotibining o‘rinbosari – Kontrterror boshqarmasi rahbari Vladimir Voronkovni qabul qildi. Bu haqda Prezident matbuot xizmati xabar qildi.
Qayd etilishicha, Voronkov BMTning Global aksilterror strategiyasi bo‘yicha Toshkent xalqaro konferensiyasi doirasida O‘zbekistonda bo‘lib turibdi.
Uchrashuv avvalida Vladimir Voronkov O‘zbekiston prezidentiga BMT bosh kotibi Antoniu Guterrishning samimiy salomi va eng ezgu tilaklarini yetkazgan. 3-mart kuni Toshkentda ish boshlaydigan ikki kunlik nufuzli xalqaro konferensiyani o‘tkazish tashabbusi va uning tashkil etilgani uchun minnatdorlik bildirilgan.
Mamlakatning BMT institut va tuzilmalari, shu jumladan Kontrterror boshqarmasi bilan amaliy hamkorligini rivojlantirish masalalari ko‘rib chiqilgan. Davlat rahbari hamkorlikning bugungi darajasini bilan qayd etgan. O‘zbekiston boshqarmaning terrorchilikka qarshi kurashish borasidagi 15 ta loyihasini amalga oshirishda faol ishtirok etgan.
Uchrashuvda Markaziy Osiyo mintaqasi davlatlarining yangilangan Qo‘shma harakat rejasini amalga oshirish va loyihalar sonini ko‘paytirishga alohida e’tibor qaratilgan.
BMT Bosh Assambleyasi tomonidan O‘zbekiston tashabbusi bilan qabul qilingan “Ma’rifat va diniy bag‘rikenglik” rezolyutsiyasi doirasida ko‘p tomonlama tadbirlar o‘tkazish, yoshlarni ekstremizm va terrorizmning salbiy ta’siridan himoya qilish, “qaynoq nuqtalar”dan qaytarilgan shaxslarni reabilitatsiya va reintegratsiya qilish sohasida tajriba almashish hamda kadrlar tayyorlash yo‘nalishida hamkorlik qilish imkoniyatlari muhokama qilingan. Mintaqa kun tartibidagi masalalar, shu jumladan, Afg‘onistondagi vaziyatning rivojlanishi, afg‘on xalqiga ko‘maklashish va yordam ko‘rsatish choralarini ko‘rish yuzasidan fikr almashilgan.
Uchrashuv yakunida O‘zbekiston va BMT Kontrterror boshqarmasi o‘rtasidagi amaliy sheriklikni kengaytirish bo‘yicha qo‘shma “yo‘l xaritasi”ni tayyorlash to‘g‘risida kelishuvga erishilgan.
Izoh (0)