Шавкат Мирзиёев 2 март куни БМТ бош котибининг ўринбосари – Контртеррор бошқармаси раҳбари Владимир Воронковни қабул қилди. Бу ҳақда Президент матбуот хизмати хабар қилди.
Қайд этилишича, Воронков БМТнинг Глобал аксилтеррор стратегияси бўйича Тошкент халқаро конференцияси доирасида Ўзбекистонда бўлиб турибди.
Учрашув аввалида Владимир Воронков Ўзбекистон президентига БМТ бош котиби Антониу Гутерришнинг самимий саломи ва энг эзгу тилакларини етказган. 3 март куни Тошкентда иш бошлайдиган икки кунлик нуфузли халқаро конференцияни ўтказиш ташаббуси ва унинг ташкил этилгани учун миннатдорлик билдирилган.
Мамлакатнинг БМТ институт ва тузилмалари, шу жумладан Контртеррор бошқармаси билан амалий ҳамкорлигини ривожлантириш масалалари кўриб чиқилган. Давлат раҳбари ҳамкорликнинг бугунги даражасини билан қайд этган. Ўзбекистон бошқарманинг террорчиликка қарши курашиш борасидаги 15 та лойиҳасини амалга оширишда фаол иштирок этган.
Учрашувда Марказий Осиё минтақаси давлатларининг янгиланган Қўшма ҳаракат режасини амалга ошириш ва лойиҳалар сонини кўпайтиришга алоҳида эътибор қаратилган.
БМТ Бош Ассамблеяси томонидан Ўзбекистон ташаббуси билан қабул қилинган «Маърифат ва диний бағрикенглик» резолюцияси доирасида кўп томонлама тадбирлар ўтказиш, ёшларни экстремизм ва терроризмнинг салбий таъсиридан ҳимоя қилиш, «қайноқ нуқталар»дан қайтарилган шахсларни реабилитация ва реинтеграция қилиш соҳасида тажриба алмашиш ҳамда кадрлар тайёрлаш йўналишида ҳамкорлик қилиш имкониятлари муҳокама қилинган. Минтақа кун тартибидаги масалалар, шу жумладан, Афғонистондаги вазиятнинг ривожланиши, афғон халқига кўмаклашиш ва ёрдам кўрсатиш чораларини кўриш юзасидан фикр алмашилган.
Учрашув якунида Ўзбекистон ва БМТ Контртеррор бошқармаси ўртасидаги амалий шерикликни кенгайтириш бўйича қўшма «йўл харитаси»ни тайёрлаш тўғрисида келишувга эришилган.
Изоҳ (0)