O‘zbekiston tashqi ishlar vaziri Abdulaziz Komilov O‘zbekistonga kelgan BMT Bosh kotibi o‘rinbosari – BMTning Terrorizmga qarshi kurashish boshqarmasi rahbari Vladimir Voronkov bilan uchrashdi, deb xabar beradi TIV matbuot xizmati. Voronkov 3–4-mart kunlari Toshkent shahrida bo‘lib o‘tadigan “BMT Global aksilterror strategiyasini amalga oshirish bo‘yicha qo‘shma harakatlar rejasi doirasida Markaziy Osiyo davlatlari o‘rtasidagi mintaqaviy hamkorlik” yuqori darajadagi xalqaro konferensiyada ishtirok etish uchun mamlakatga kelgan.
Uchrashuvda O‘zbekiston va BMT o‘rtasidagi hamkorlikning bugungi holati va uni rivojlantirish istiqbollari muhokama qilingan. Xususan, O‘zbekiston bilan tashkilotning Terrorizmga qarshi kurashish boshqarmasi o‘rtasidagi hamkorlikning asosiy yo‘nalishlari ko‘rib chiqilgan.
Ta’kidlanishicha, O‘zbekiston so‘nggi yillarda BMTning terrorizm va ekstremizmga qarshi kurashish masalalari bo‘yicha ixtisoslashgan tuzilmalari bilan faol hamkorlik qilib kelmoqda va bu boradagi asosiy universal huquqiy hujjatlarning ishtirokchisi hisoblanadi.
O‘zbekiston tomonining tashabbusi bilan BMT Bosh assambleyasining 4 ta rezolyutsiyasi qabul qilingan. 2021-yili O‘zbekiston ilk bor Inson huquqlari bo‘yicha Kengashga a’zo bo‘lgan, unda O‘zbekiston vakili 2022-yilga rais o‘rinbosari etib tayinlangan.
Tomonlar, shuningdek, O‘zbekistonning Birlashgan Millatlar Tashkilotiga a’zo bo‘lganining 30 yilligi (1992-yil 2-mart) munosabati bilan o‘zaro tabriklar almashgan.
Tashqi ishlar vazirligi rasmiy vakilining yozishicha, uchrashuv davomida Abdulaziz Komilov “Mehr” maxsus operatsiyasi haqida to‘xtalib o‘tgan.
“O‘zbekistonning ‘Mehr’ maxsus operatsiyalari doirasida o‘z fuqarolarini urush hududlaridan qaytarish va ularning jamiyatga integratsiyalashuvini ta’minlash tajribasi BMTga a’zo ko‘plab mamlakatlar uchun foydali bo‘ladi deb hisoblaymiz”, — deydi Komilov.
Ma’lumot uchun, “Mehr” insonparvarlik operatsiyasi ilk bor 2019-yili amalga oshirilgan bo‘lib, unda 156 nafar o‘zbekistonlik, asosan, ayollar va bolalar Suriya poytaxti Damashqdan maxsus reys bilan O‘zbekistonga olib kelingan. 2019-yilning oktabr oyida esa Yaqin Sharqdagi mojarolar hududidan o‘zbekistonliklarni qaytarish bo‘yicha ikkinchi maxsus operatsiya amalga oshirilgan. 2020-yilning dekabridagi uchinchi maxsus operatsiya doirasida Suriyadan 25 nafar ayol va 73 nafar bola, 2021-yildagi “Mehr-4” operatsiyada esa 24 nafar fuqaro Afg‘onistondan O‘zbekistonga qaytarilgan. Beshinchi “Mehr” operatsiyasida 93 nafar kishi mamlakatga olib kelingan.
Izoh (0)