Ijtimoiy tarmoqlarda maktab o‘quvchilari uchun mo‘ljallangan yagona elektron ta’lim platformasi “Kundalik.com” tizimida ayollar gigiyenik vositasi reklama qilinayotgani to‘g‘risida xabar berilgandi. Iste’molchilar huquqlarini himoya qilish agentligi “Kundalik” MChJga voyaga yetmagan shaxslarga mo‘ljallanmagan mahsulotlarning reklama va marketingiga yo‘l qo‘ymaslik bo‘yicha so‘rov xati ham yuborgan. “Kundalik” elektron ta’lim platformasi holat yuzasidan izoh berdi.
Ma’lum qilinishicha, sayt sahifalarida “Reklama to‘g‘risida”gi 1998-yil 25-dekabrdagi N 723-I qonuniga zid bo‘lmagan mazmundagi reklama mavjud. “Kundalik.com” faqat tasdiqlangan reklama beruvchilarning reklamalarini 6+ toifasiga muvofiq joylashtiradi.
Ta’kidlanishicha, ayollar gigiyenasi mavzusidagi reklamalar faqat auditoriyaning ayollar qismigagina ko‘rsatiladi. Shu bilan birga, bunday mazmundagi reklama ta’limiy xususiyatga ega bo‘lib, qizlar va onalarning o‘z salomatligidan xabardorlik darajasini oshiradi. Xizmatlardan foydalanishdan avval qabul qilingan foydalanuvchi shartnomasida reklama mazmuni mavjudligi to‘g‘risidagi ma’lumotlar mavjud (1.12-band).
“Qayd etamiz, reklama elektron kundalikka kirish va ro‘yxatdan o‘tkazish uchun to‘lovdan qat’i nazar joylashtiriladi, bunda qonun buzilishi yo‘q. Hozirda ushbu brend bilan hamkorlik auditoriya ayollar salomatligi mavzusining ahamiyatini noto‘g‘ri tushungani va axborot xabarini noto‘g‘ri talqin qilishiga yo‘l qo‘ymaslik maqsadida to‘xtatib qo‘yilgan”, — deyiladi izohda.
Eslatib o‘tamiz, O‘zbekiston maktablarida “Kundalik” elektron tizimini tatbiq etish 2019-yildan boshlangan edi. Boshlang‘ich davrda tizimdan foydalanish bepul bo‘lgan, 2020-yil noyabridan pullik tartibga o‘tgan. O‘shanda tizimdan bir yillik foydalanish bahosi bir o‘quvchi uchun 9200 so‘m edi (hozirda 10 ming so‘mni tashkil etadi)
Ushbu tizimning tatbiq etilishi o‘qituvchi va ota-onalarning barchasi tomonidan ham birdek iliq kutib olinmagan. Xususan, Xalq ta’limi vazirligi tomonidan taklif etilayotgan pullik kundalik tizimi bolalarning bepul ta’lim olish huquqiga daxl qilmaydimi, degan masala muntazam kun tartibiga chiqib turadi.
Izoh (0)