Shavkat Mirziyoyev Vazirlar Mahkamasiga O‘zbekistonning asosiy savdo hamkorlari bo‘lgan ayrim mamlakatlarda yuzaga kelayotgan vaziyatni hisobga olgan holda, vujudga kelishi mumkin bo‘lgan barcha salbiy ijtimoiy-iqtisodiy oqibatlarni yumshatish bo‘yicha respublikaning har bir tarmog‘i va hududi kesimida aniq chora-tadbirlarning batafsil rejasini ishlab chiqishga topshiriq berdi.
Prezident matbuot kotibi Sherzod Asadovning ma’lum qilishicha, moliya tizimining barqarorligi, korxonalarning uzluksiz ishlashi va rejalashtirilgan investitsiya loyihalari o‘z vaqtida amalga oshirilishini ta’minlash vazifalariga alohida e’tibor qaratildi.
Tarmoq va hududlar rahbarlari oldiga transport-logistika tarmog‘ining ishonchli faoliyatini ta’minlash bo‘yicha qo‘shimcha chora-tadbirlar ko‘rish, bunda eksport geografiyasi yanada diversifikatsiya qilinishini ham hisobga olish vazifasi qo‘yildi.
Viloyatlar hokimlariga aholini ijtimoiy himoya qilish ishlarini kuchaytirish, yangi ish o‘rinlari yaratish va ishsiz aholi bandligini ta’minlashni jadallashtirish, shuningdek, inflyatsiya darajasini doimiy monitoring qilish va iste’mol bozorida narxlarning keskin tebranishlariga yo‘l qo‘ymaslik bo‘yicha avvaldan chora ko‘rish zarurligi alohida ko‘rsatib o‘tildi.
Davlat statistika qo‘mitasi ma’lumotlariga ko‘ra, Rossiya va Ukraina O‘zbekistonning tashqi savdodagi yuqori ulushga ega bo‘lgan hamkor davlatlardan hisoblanadi. Ayni paytda bu ikki davlat o‘rtasidagi vaziyat tobora taranglashib bormoqda.Davom etayotgan harbiy vaziyat tufayli Ukrainadagi barcha O‘zbekiston korxonalari faoliyatini to‘xtatdi. TIV axborot xizmati axborotiga ko‘ra, 2022-yil uchun tasdiqlangan maqsadli investitsiya dasturi doirasida Ukraina kompaniyalari ishtirokida umumiy qiymati 16,5 million AQSh dollaridan iborat 4 ta investitsiya loyihasini amalga oshirish ko‘zda tutilgan. Mavjud vaziyat tufayli yuqoridagi va boshqa ishlab chiqilayotgan investitsiya loyihalarini amalga oshirish qiyinlashadi.
Rossiya esa Ukraina mojarolari bilan bog‘liq sanksiyalarga duch keldi. Iqtisodiy tadqiqotlar va islohotlar markazi mutaxassislarining aytishicha, ushbu sanksiyalar anchayin jiddiy bo‘lib, uning salbiy oqibatlari nafaqat Rossiyaga, balki boshqa mamlakatlar iqtisodiyotiga ham ta’sir o‘tkazishi mumkin.
Izoh (0)