O‘zbekistondagi har bir oliy ta’lim muassasasida kuzatuv kengashi tashkil etilishi mumkin

Oliy va o‘rta maxsus ta’lim vazirligi Normativ-huquqiy hujjatlar loyihalari muhokamasi portaliga “Oliy ta’lim muassasasining kuzatuv (vasiylik) kengashi to‘g‘risidagi namunaviy nizomni tasdiqlash to‘g‘risida”gi Vazirlar Mahkamasi qarori loyihasi muhokamaga qo‘ydi.

Qaror loyihasiga ko‘ra:

• Kengash oliy ta’lim muassasasini samarali boshqarishda strategik organ hisoblanadi;
• Kengash ta’lim yo‘nalishlari, mutaxassisliklar hamda ixtisosliklar bo‘yicha to‘lov-kontrakt asosida o‘qishga qabul parametrlarini ham belgilaydi;
• Kengash tarkibiga Oliy Majlis palatalari a’zolari, xalq, mahalliy kengash deputatlari, vazirlik, idoralar, NNT, OAV va jamoatchilik vakillari, homiylar, shuningdek, OTM faoliyatini rivojlantirishdan manfaatdor bo‘lgan yuridik va jismoniy shaxslar kirishi mumkin.

Kengash tarkibiga huquqni muhofaza qilish va sud organlarining, harbiylashtirilgan tuzilmalarning, shuningdek, O‘zbekiston prezidentiga hisobot beradigan davlat boshqaruvi organlarining rahbarlari kiritiladigan holatlarda tasarrufida tegishli oliy ta’lim muassasasi bo‘lgan vazirlik va idoraning taqdimnomasiga binoan Vazirlar Mahkamasi tomonidan O‘zbekiston prezidentiga ko‘rib chiqish uchun kiritiladi.