Ўзбекистон ташқи ишлар вазири Абдулазиз Комилов Ўзбекистонга келган БМТ Бош котиби ўринбосари – БМТнинг Терроризмга қарши курашиш бошқармаси раҳбари Владимир Воронков билан учрашди, деб хабар беради ТИВ матбуот хизмати. Воронков 3–4 март кунлари Тошкент шаҳрида бўлиб ўтадиган «БМТ Глобал аксилтеррор стратегиясини амалга ошириш бўйича қўшма ҳаракатлар режаси доирасида Марказий Осиё давлатлари ўртасидаги минтақавий ҳамкорлик» юқори даражадаги халқаро конференцияда иштирок этиш учун мамлакатга келган.
Учрашувда Ўзбекистон ва БМТ ўртасидаги ҳамкорликнинг бугунги ҳолати ва уни ривожлантириш истиқболлари муҳокама қилинган. Хусусан, Ўзбекистон билан ташкилотнинг Терроризмга қарши курашиш бошқармаси ўртасидаги ҳамкорликнинг асосий йўналишлари кўриб чиқилган.
Таъкидланишича, Ўзбекистон сўнгги йилларда БМТнинг терроризм ва экстремизмга қарши курашиш масалалари бўйича ихтисослашган тузилмалари билан фаол ҳамкорлик қилиб келмоқда ва бу борадаги асосий универсал ҳуқуқий ҳужжатларнинг иштирокчиси ҳисобланади.
Ўзбекистон томонининг ташаббуси билан БМТ Бош ассамблеясининг 4 та резолюцияси қабул қилинган. 2021 йили Ўзбекистон илк бор Инсон ҳуқуқлари бўйича Кенгашга аъзо бўлган, унда Ўзбекистон вакили 2022 йилга раис ўринбосари этиб тайинланган.
Томонлар, шунингдек, Ўзбекистоннинг Бирлашган Миллатлар Ташкилотига аъзо бўлганининг 30 йиллиги (1992 йил 2 март) муносабати билан ўзаро табриклар алмашган.
Ташқи ишлар вазирлиги расмий вакилининг ёзишича, учрашув давомида Абдулазиз Комилов «Меҳр» махсус операцияси ҳақида тўхталиб ўтган.
«Ўзбекистоннинг ‘Меҳр’ махсус операциялари доирасида ўз фуқароларини уруш ҳудудларидан қайтариш ва уларнинг жамиятга интеграциялашувини таъминлаш тажрибаси БМТга аъзо кўплаб мамлакатлар учун фойдали бўлади деб ҳисоблаймиз», — дейди Комилов.
Маълумот учун, «Меҳр» инсонпарварлик операцияси илк бор 2019 йили амалга оширилган бўлиб, унда 156 нафар ўзбекистонлик, асосан, аёллар ва болалар Сурия пойтахти Дамашқдан махсус рейс билан Ўзбекистонга олиб келинган. 2019 йилнинг октябрь ойида эса Яқин Шарқдаги можаролар ҳудудидан ўзбекистонликларни қайтариш бўйича иккинчи махсус операция амалга оширилган. 2020 йилнинг декабридаги учинчи махсус операция доирасида Суриядан 25 нафар аёл ва 73 нафар бола, 2021 йилдаги «Меҳр-4» операцияда эса 24 нафар фуқаро Афғонистондан Ўзбекистонга қайтарилган. Бешинчи «Меҳр» операциясида 93 нафар киши мамлакатга олиб келинган.
Изоҳ (0)