Namangan shahridagi “Pahlavon” sport majmuasida “Navbahor” futbol klubining mavsumoldi taqdimot marosimi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Marosimga kelgan jamoani viloyat hokimi Shavkat Abdurazzoqov boshchiligida sektor rahbarlari majmuaning kirish qismida kutib oldi.
“Navbahor” zalga kirib kelganida esa minglab muxlislar olqishlar bilan qarshiladi. Bundan murabbiy va futbolchilar, xususan, jamoa bosh murabbiyi Samvel Babayanning kayfiyati chog‘ bo‘lganini payqash qiyin emasdi.
Tadbirni viloyat hokimi, viloyat futbol assotsiatsiyasi prezidenti Shavkat Abdurazzoqov ochib berdi.
Uning aytishicha, Namangan joriy yilgi mavsumda bir qator yirik musobaqalarga mezbonlik qiladi. Jumladan, 21—30-mart kunlari O‘zbekiston milliy terma jamoasi va bir necha jamoa ishtirokidagi xalqaro turnir, iyun oyida esa Osiyo Kubogining milliy terma jamoa ishtirokidagi saralash o‘yinlari aynan Namanganda o‘tkazilishi rejalashtirilgan.
Abdurazzoqovning ta’kidlashicha, “Navbahor”da bu yilgidek kuchli tarkib va yaratilgan sharoit yaqin orada bo‘lmagan.
“Barcha sharoitlarni yaratib berdik. Jamoa xorijda ikki marta mashg‘ulot o‘tab qaytdi, baza to‘liq ta’mirdan chiqarildi. Besh yildan beri ‘Navbahor’ bilan bevosita ishlab kelayotgan bo‘lsam, bunday kuchli tarkibga endi duch kelishim. Buni ancha oldin faqat Viktor Jalilov ko‘rgan bo‘lsa kerak. Endi yigitlarimizga faqat omad tilash qoldi”, — dedi viloyat hokimi.
Joriy yilgi mavsumda “Navbahor” o‘z tarkibiga 12 nafar yangi o‘yinchini qo‘shib oldi. Ular safida himoyachilar Rustam Ashurmatov (“Kanvon”, Janubiy Koreya), Yegor Krimets (“Paxtakor”), Stanislav Andreyev (“Metallurg”), yarim himoyachilar Islom Kenjaboyev va Elguja Grigalashvili (ikkalasi “Qizilqum”), Jamshid Boltaboyev (“So‘g‘diyona”), Asadbek Sobirjonov (“Paxtakor”), Nurillo To‘xtasinov (“Bunyodkor”), Jamshid Iskandarov (“Sonnam”, Janubiy Koreya), Yovan Jokich (“OKMK”), hujumchilar Zoran Marushich (“Dinamo”, Tbilisi) va Andrey Sidorov (“Qo‘qon-1912”) bor.
Shundan so‘ng klubning yangi logotipi taqdim etildi.
Uning markazida jamoa ramzi lochin aks ettirilgan, aylanasida esa “Navbahor” va “Namangan” so‘zlari hamda klub tashkil etilgan sana — 1978-yil tushirilgan.
Jamoa bu yil yangi logotipdagi kabi ko‘k va oq rangdagi futbolkalarda maydonga tushadi.
Ma’lumot uchun, “Navbahor” jamoasi yangi mavsumdagi ilk o‘yinini 3-mart kuni Namangandagi “Markaziy” o‘yingohida Qarshining “Nasaf” jamoasiga qarshi o‘tkazadi.
Izoh (0)