Ayni paytda Polshaning Katovitse aeroportida 241 nafar O‘zbekiston fuqarosi Toshkentdan kelgan Uzbekistan Airways bortiga o‘tirmoqda, deb xabar beradi “Dunyo” AA.
Qayd etilishicha, 28-fevral kuni Toshkentdan uchib ketgan ikkinchi reys Polshaga soat 17:00 lar atrofida (Toshkent vaqti bilan 21:00 da) yetib borishi kutilmoqda.
O‘zbekistonning Kiyevdagi elchixonasidan olingan ma’lumotga ko‘ra, Ukrainaning “Krakoves” nazorat o‘tkazish punkti orqali fuqarolar o‘tkazilishini tezlashtirish maqsadida 7 ta avtobus ijaraga olingan. Shu bilan birga, O‘zbekiston fuqarolari o‘z vataniga jo‘nab ketish uchun Ukrainaning Lvov shahriga kelishda davom etmoqda.
Eslatib o‘tamiz, 28-fevral kuni Ukrainadan evakuatsiya qilinadigan o‘zbekistonliklarni olib kelish uchun Toshkentdan Polshaga birinchi maxsus samolyot yetib borgandi.
Fuqarolarini evakuatsiya qilish bo‘yicha O‘zbekistonning Kiyev va Varshavadagi elchixonalarining hamkorlikdagi ishlari davom etmoqda.
Eslatib o‘tamiz, O‘zbekiston Tashqi ishlar vazirligi Ukraina hududida 4300 ga yaqin O‘zbekiston fuqarosi borligini ma’lum qilgandi. Ularni Ukrainadan Polsha orqali vatanga qaytarish bo‘yicha O‘zbekistonning Polshadagi elchixonasi tomonidan tizimli ishlar amalga oshirilmoqda. Fuqarolar Lvovgacha poyezdda, Polsha chegarasigacha avtobusda, undan so‘ng esa piyoda boradi. Chegarani kesib o‘tish uzoq vaqt oladi. Birinchi guruh uchun bu jarayon 14 soat davom etgan.
Polsha hududida tashkil etilgan to‘planish joyida asosiy qismi yosh bolasi bor ayollardan iborat O‘zbekiston fuqarolari uchun sharoitlar yaratilgan. Xususan, ko‘rpa-to‘shak, tibbiy yordam, issiq ovqat berilgan. Vatanga qaytayotgan O‘zbekiston fuqarolariga hech qanday PZR-sertifikatlarini taqdim etish va Polshaga kirish vizasini rasmiylashtirish talab qilinmaydi.
Elchixona, shuningdek, xavfsizlik tamoyilidan kelib chiqib, fuqarolar uchun Moldovaga borish osonroq bo‘lsa, ushbu variantni ko‘rib chiqishlari lozim ekanini bildirgan.
Izoh (0)