Янги логотип, кучли таркиб ва кайфияти чоғ Бабаян: «Навбаҳор» мавсумолди тақдимот маросимини ўтказди (фото)

Наманган шаҳридаги «Паҳлавон» спорт мажмуасида «Навбаҳор» футбол клубининг мавсумолди тақдимот маросими бўлиб ўтди. Бу ҳақда «Дарё» мухбири Азизбек Абдувалиев хабар бермоқда.

Маросимга келган жамоани вилоят ҳокими Шавкат Абдураззоқов бошчилигида сектор раҳбарлари мажмуанинг кириш қисмида кутиб олди.

«Навбаҳор» залга кириб келганида эса минглаб мухлислар олқишлар билан қаршилади. Бундан мураббий ва футболчилар, хусусан, жамоа бош мураббийи Самвел Бабаяннинг кайфияти чоғ бўлганини пайқаш қийин эмасди.

Тадбирни вилоят ҳокими, вилоят футбол ассоциацияси президенти Шавкат Абдураззоқов очиб берди.

Унинг айтишича, Наманган жорий йилги мавсумда бир қатор йирик мусобақаларга мезбонлик қилади. Жумладан, 21—30 март кунлари Ўзбекистон миллий терма жамоаси ва бир неча жамоа иштирокидаги халқаро турнир, июнь ойида эса Осиё Кубогининг миллий терма жамоа иштирокидаги саралаш ўйинлари айнан Наманганда ўтказилиши режалаштирилган.

Абдураззоқовнинг таъкидлашича, «Навбаҳор»да бу йилгидек кучли таркиб ва яратилган шароит яқин орада бўлмаган.

«Барча шароитларни яратиб бердик. Жамоа хорижда икки марта машғулот ўтаб қайтди, база тўлиқ таъмирдан чиқарилди. Беш йилдан бери ‘Навбаҳор’ билан бевосита ишлаб келаётган бўлсам, бундай кучли таркибга энди дуч келишим. Буни анча олдин фақат Виктор Жалилов кўрган бўлса керак. Энди йигитларимизга фақат омад тилаш қолди», — деди вилоят ҳокими.

Жорий йилги мавсумда «Навбаҳор» ўз таркибига 12 нафар янги ўйинчини қўшиб олди. Улар сафида ҳимоячилар Рустам Ашурматов («Канвон», Жанубий Корея), Егор Кримец («Пахтакор»), Станислав Андреев («Металлург»), ярим ҳимоячилар Ислом Кенжабоев ва Элгужа Григалашвили (иккаласи «Қизилқум»), Жамшид Болтабоев («Сўғдиёна»), Асадбек Собиржонов («Пахтакор»), Нурилло Тўхтасинов («Бунёдкор»), Жамшид Искандаров («Соннам», Жанубий Корея), Йован Жокич («ОКМК»), ҳужумчилар Зоран Марушич («Динамо», Тбилиси) ва Андрей Сидоров («Қўқон-1912») бор.

Шундан сўнг клубнинг янги логотипи тақдим этилди.

Унинг марказида жамоа рамзи лочин акс эттирилган, айланасида эса «Навбаҳор» ва «Наманган» сўзлари ҳамда клуб ташкил этилган сана — 1978 йил туширилган.

Жамоа бу йил янги логотипдаги каби кўк ва оқ рангдаги футболкаларда майдонга тушади.

Маълумот учун, «Навбаҳор» жамоаси янги мавсумдаги илк ўйинини 3 март куни Намангандаги «Марказий» ўйингоҳида Қаршининг «Насаф» жамоасига қарши ўтказади.